Posted on: 13 Nov 2010
കെ.എ. ജോണി
ചെന്നൈ:
എസ്.എന്‍.സി. ലാവലിന്‍ കരാറുമായി ബന്ധപ്പെട്ട് കേരളത്തിലെ
രാഷ്ട്രീയനേതാക്കളും കെ.എസ്.ഇ.ബി. ഉദ്യോഗസ്ഥരുമായി ദിലീപ്‌രാഹുലന്‍
നടത്തിയിട്ടുള്ള സാമ്പത്തിക ഇടപാടുകളുടെ വിശദവിവരങ്ങള്‍ സി.ബി.ഐ.
അന്വേഷണസംഘത്തിന് കൈമാറിയിട്ടുണ്ടെന്ന് തിരുവനന്തപുരം സ്വദേശിയും
ചെന്നൈയില്‍ വ്യവസായിയുമായ ദീപക്കുമാര്‍ പറഞ്ഞു. ഇതുമായി ബന്ധപ്പെട്ട്
സാഹചര്യത്തെളിവുകള്‍ ശേഖരിച്ചുകൊണ്ടിരിക്കുന്നതിനിടയിലാണ്
അന്വേഷണച്ചുമതലയില്‍ നിന്ന് ഡിവൈ.എസ്.പി. അശോക്കുമാറിനെ നീക്കിയതെന്ന്
ദീപക് ആരോപിച്ചു.1996-ല്‍ നിയമസഭാ തിരഞ്ഞെടുപ്പിന് തൊട്ടുമുമ്പായാണ് ദിലീപ് രാഹുലന്‍ തന്നെയും കൂട്ടി കണ്ണൂരിലെത്തി സി.പി.എം. നേതാവ് പിണറായി വിജയന് പണം കൈമാറിയതെന്നും ഇതില്‍ വലിയൊരു തുക ദിലീപ് എറണാകുളത്തുള്ള കനറാബാങ്ക് ശാഖയില്‍ നിന്ന് പിന്‍വലിച്ചതിന് താന്‍ സാക്ഷിയാണെന്നും ദീപക്കുമാര്‍ പറഞ്ഞു.
കേരളത്തില്‍ ഒരു റബര്‍ എസ്റ്റേറ്റ് വാങ്ങാനുണ്ടെന്ന് പറഞ്ഞാണ് ദിലീപ് രാഹുലന്‍ തന്നെയും കൂട്ടി ചെന്നൈയില്‍ നിന്ന് എറണാകുളത്തെത്തിയതെന്ന് ദീപക് പറഞ്ഞു. ചെന്നൈയില്‍ നിന്നു കൊച്ചിക്ക് നേരിട്ടുള്ള വിമാനം കിട്ടാതിരുന്നതിനാല്‍ മുംബൈക്ക് പോയിട്ട് അവിടെ നിന്നു കൊച്ചിയില്‍ എത്തുകയായിരുന്നു. ഉച്ചതിരിഞ്ഞ് മൂന്നു മണിയോടെയാണ് കൊച്ചിയിലെത്തിയത്. കൊച്ചിയില്‍ ദിലീപ്‌രാഹുലന്റെ അമ്മ താമസിച്ചിരുന്ന ഫ്‌ളാറ്റില്‍ പോയതിനുശേഷമാണ് ബാങ്കിലേക്ക് പോയത്. ഫ്‌ളാറ്റില്‍ നിന്നിറങ്ങുംമുമ്പ് ദിലീപ് രാഹുലന്‍ ഒരു ബാഗെടുത്ത് കാറിന്റെ ഡിക്കിയില്‍ വെച്ചു.
ബാങ്കിങ് സമയം കഴിഞ്ഞിരുന്നെങ്കിലും ബാങ്ക് മാനേജര്‍ ദിലീപിനെ കാത്തിരിക്കുന്നുണ്ടായിരുന്നുവെന്നും ബാങ്കിലേക്ക് പോയി വലിയ താമസമില്ലാതെ ദിലീപ് മറ്റൊരു ബാഗുമായി മടങ്ങിയെത്തിയെന്നും ദീപക് പറഞ്ഞു. തുടര്‍ന്ന് കണ്ണൂര്‍ക്ക് പോകാമെന്ന് ദിലീപ് പറഞ്ഞെന്നും ദിലീപിന് കൊച്ചിയിലുണ്ടായിരുന്ന സിയലോ കാര്‍ അന്നു താന്‍ തന്നെയാണ് ഡ്രൈവ് ചെയ്തതെന്നും ദീപക് പറഞ്ഞു. അന്നു രാത്രി കോഴിക്കോട്ടെ ഒരു ഹോട്ടലില്‍ തങ്ങി അടുത്ത ദിവസം രാവിലെയാണ് കണ്ണൂര്‍ക്ക് പോയത്. കണ്ണൂര്‍ക്കുള്ള യാത്രയില്‍ തലശ്ശേരി കഴിഞ്ഞപ്പോള്‍ വഴികാട്ടുന്നതിന് മറ്റൊരു കാറെത്തി. ഈ കാറിനെ പിന്തുടര്‍ന്നാണ് പിണറായി വിജയന് താമസിക്കുന്നിടത്തെത്തിയതെന്നും ദീപക് പറഞ്ഞു.
ദിലീപ് രാഹുലന്‍ ഈ കാലയളവില്‍ നടത്തിയ പണമിടപാടുകളുമായി ബന്ധപ്പെട്ട് ഡിവൈ.എസ്.പി. അശോക്കുമാറിന്റെ നേതൃത്വത്തിലുള്ള അന്വേഷണസംഘം കേരളത്തിലെ പല പൊതുമേഖലാ ബാങ്കുകളിലും പരിശോധന നടത്തിയിരുന്നുവെന്നും നിര്‍ണായകമായ തെളിവുകള്‍ അവര്‍ക്ക് ലഭിച്ചിട്ടുണ്ടെന്നാണ് തനിക്കുള്ള വിവരമെന്നും
ദീപക് പറഞ്ഞു. ഈ തെളിവുകളുടെ അടിസ്ഥാനത്തില്‍ ദിലീപ് രാഹുലനെ പ്രതിപ്പട്ടികയില്‍ ചേര്‍ക്കുന്നതിന് സി.ബി.ഐ. അന്വേഷണ സംഘം തയ്യാറെടുക്കുന്നതിനിടയിലാണ് ഡിവൈ.എസ്.പി. അശോക്കുമാറിനെ അന്വേഷണച്ചുമതലയില്‍ നിന്ന് മാറ്റിയിരിക്കുന്നതെന്ന് ദീപക്കുമാര്‍ കുറ്റപ്പെടുത്തി.
പിണറായി വിജയനെ കണ്ടുമടങ്ങുംവഴി ദിലീപും താനും ഗുരുവായൂര്‍ ക്ഷേത്രത്തില്‍ ദര്‍ശനം നടത്തിയെന്നും ലക്ഷങ്ങളുടെ നോട്ടുകെട്ടുകളാണ് ദിലീപ് അന്ന് കാണിക്കയിട്ടതെന്നും ദീപക് പറഞ്ഞു.
ദിലീപ് രാഹുലന്‍ കൊല്ലം ടി.കെ.എം. എന്‍ജിനീയറിങ് കോളേജില്‍ പഠിക്കുമ്പോള്‍ തുടങ്ങിയതാണ് തങ്ങളുടെ സൗഹൃദമെന്ന് ദീപക് പറഞ്ഞു. എന്‍ജിനീയറിങ് പഠനം കഴിഞ്ഞ് ദിലീപ് വിദേശത്തേക്കും ബി.കോം പൂര്‍ത്തിയാക്കി താന്‍ ചെന്നൈയിലും എത്തുകയായിരുന്നു. റബര്‍വുഡ് ബിസിനസ്സില്‍ ഇന്ത്യയില്‍ത്തന്നെ ആദ്യകാല സംരംഭങ്ങള്‍ക്ക് തുടക്കമിട്ട വ്യക്തിയാണ് ദീപക്കുമാര്‍. കേരളത്തിലെ പല രാഷ്ട്രീയ നേതാക്കളെയും ദിലീപ് രാഹുലന്‍ താന്‍ വഴിയാണ് പരിചയപ്പെട്ടതെന്നും മുന്‍മുഖ്യമന്ത്രി ഇ.കെ. നായനാര്‍ വഴിയാണ് ദിലീപ് പിണറായി വിജയനുമായി സൗഹൃദത്തിലായതെന്നും ദീപക് പറഞ്ഞു. നായനാരും പിണറായി വിജയനുമടങ്ങിയ സംഘം കാനഡ യാത്ര നടത്തിയപ്പോള്‍ ആതിഥേയനായി ദിലീപുണ്ടായിരുന്നുവെന്നും ദീപക് വ്യക്തമാക്കി. എസ്.എന്‍.സി. ലാവലിന്‍ കരാറിന്റെ കാര്യത്തില്‍ ദിലീപ് രാഹുലനായിരുന്നു മുഖ്യ ഇടനിലക്കാരനെന്നും ചില ബിസിനസ് ഇടപാടുകളില്‍ തന്നെ കബളിപ്പിച്ചതോടെയാണ് താന്‍ ദിലീപുമായി തെറ്റിയതെന്നും ദീപക് പറഞ്ഞു. സ്വന്തം വ്യവസായ സംരംഭങ്ങള്‍ നടത്തുന്ന താന്‍ ഒരിക്കലും ടെക്‌നിക്കാലിയ കണ്‍സള്‍ട്ടന്‍സിയില്‍ ജോലിനോക്കിയിട്ടില്ലെന്നും ദീപക് വ്യക്തമാക്കി.
Related News
- ലാവ്‌ലിന്‍ കേസ് തിരുവനന്തപുരം സി.ബി.ഐ. കോടതിയില്‍ (27 Nov, 2011)
- പിണറായി രാജിവെയ്ക്കണം -സി.എം.പി. (01 Apr, 2011)
- ലാവലിന്‍ കേസ്: മുഖ്യമന്ത്രി നിലപാട് വ്യക്തമാക്കണം -ബി.ജെ.പി. (01 Apr, 2011)
- ലാവലിന്‍: സുപ്രീംകോടതിവിധി ആശ്ചര്യകരമെന്ന് പിണറായി (01 Apr, 2011)
- പിണറായിയുടെ ഹര്‍ജി: നടപടി പൂര്‍ത്തിയാക്കിയത് ഒരു മണിക്കൂറിനുള്ളില്‍ (31 Mar, 2011)
- ലാവലിന്‍വിധി സര്‍ക്കാരിനേറ്റ മുഖത്തടി-ഉമ്മന്‍ചാണ്ടി (31 Mar, 2011)
- ലാവലിന്‍: പ്രതിരോധത്തിലൂന്നാന്‍ സി.പി.എം. നിര്‍ബദ്ധമാവും (31 Mar, 2011)
- സുപ്രീംകോടതി വിധി സര്‍ക്കാര്‍ നിലപാടിനുള്ള തിരിച്ചടി- അഡ്വ. ആസഫലി (31 Mar, 2011)
- ലാവലിന്‍: 'ശക്തനായ പാര്‍ട്ടി സെക്രട്ടറി'ക്ക് കനത്ത തിരിച്ചടി (31 Mar, 2011)
- ലാവലിന്‍: പിണറായിയുടെ ഹര്‍ജി സുപ്രീം കോടതി തള്ളി (31 Mar, 2011)
- ലാവലിന്‍ കേസില്‍ ഇടമലയാര്‍ കേസിലെ വിധി ഹാജരാക്കി (25 Feb, 2011)
- ലാവലിന്‍: വിദേശത്തുള്ള പ്രതിയെ പിടികിട്ടാപ്പുള്ളിയാക്കും - സി.ബി.ഐ (25 Feb, 2011)
- ലാവലിന്‍ കേസ്: കമ്പനി മുന്‍ വൈസ് പ്രസിഡന്റിന് വീണ്ടും അറസ്റ്റ് വാറന്റ് (12 Feb, 2011)
- ലാവലിന്‍: പിണറായിക്കു തിരിച്ചടി (04 Feb, 2011)
- ലാവലിന്‍ കേസ് ഇനി പുതിയ ബെഞ്ചില്‍ (04 Feb, 2011)
- സിപിഎം മൗനം: ലാവലിന്‍ വീണ്ടും പുകയുന്നു (06 Jan, 2011)
- ലാവലിന്‍: വിവാദങ്ങള്‍ ഉയര്‍ത്തുന്നത് യാഥാര്‍ഥ്യം മറച്ചുവെക്കാന്‍ -എം.എ. ബേബി (05 Dec, 2010)
- ലാവലിന്‍ കേസില്‍ വഴിത്തിരിവ്, പള്ളിവാസല്‍ പുനര്‍നവീകരണം സി.ബി.ഐ. പരിശോധിക്കുന്നു (05 Dec, 2010)
- ലാവലിന്‍കേസ്: ചന്ദ്രപ്പന് സി.പി.എമ്മിന്റെ മറുപടി (05 Dec, 2010)
- ലാവലിന്‍ കമ്പനിയുടെ കാനഡയിലെ ഓഫീസിലേക്ക് വീണ്ടും സമന്‍സ്‌ (26 Nov, 2010)
- ലാവലിന്‍: പോലീസ് സംരക്ഷണം തേടി ദീപക്കുമാര്‍ മുഖ്യമന്ത്രിയെ കണ്ടു (22 Nov, 2010)
- ലാവലിന്‍: ചന്ദ്രപ്പന്റെ പരാമര്‍ശം എല്‍.ഡി.എഫില്‍ വീണ്ടും രാഷ്ട്രീയപ്രശ്‌നമാകുന്നു (22 Nov, 2010)
- ലാവലിന്‍: പിണറായിയെ ന്യായീകരിച്ച് വീണ്ടും കേന്ദ്രനേതൃത്വം (22 Nov, 2010)
- ലാവലിന്‍ കേസ് സി.പി.എം. ഗൗരവമായി പരിശോധിക്കണം -ചന്ദ്രപ്പന് (22 Nov, 2010)
- ലാവ്‌ലിന്‍ വയലാര്‍ രവിയെ മാറ്റിനിര്‍ത്തി അന്വേഷിക്കണം- ബി.ജെ.പി. (18 Nov, 2010)
- ലാവലിന്‍: ഡിവൈ.എസ്.പി.യെ മാറ്റിയതിനെതിരെ കോടതിയെ സമീപിക്കും (16 Nov, 2010)
- ലാവലിന്‍: വയലാര്‍ രവിയുടെ പേര് വലിച്ചിഴയ്ക്കുന്നതെന്തിന് ? -മുല്ലപ്പള്ളി (14 Nov, 2010)
- ലാവ്‌ലിന്‍: പ്രതികരിക്കാനില്ലെന്ന് വയലാര്‍ രവി (14 Nov, 2010)
- വയലാര്‍ രവിയുടെ രാഷ്ട്രീയപാരമ്പര്യമറിയുന്നവര്‍ ആരോപണങ്ങള്‍ വിശ്വസിക്കില്ല-എം.എം.ഹസ്സന്‍ (14 Nov, 2010)
- ലാവലിന്‍: ദിലീപ് രാഹുലനെ പ്രതിചേര്‍ത്ത് അന്വേഷിക്കണം (13 Nov, 2010)
Tags: Mathrubhumi Newspaper Edition. Kerala, India, Asia, World News. Malayalam
