Tuesday, September 8, 2009

പോള്‍ വധം: മുഖ്യപ്രതി അറസ്റ്റില്‍ - 26 aug

Date : August 26 2009 (mbi)

ആലപ്പുഴ: പോള്‍ എം. ജോര്‍ജ്‌ മുത്തൂറ്റിന്റെ കൊലപാതകത്തിലെ മുഖ്യ പ്രതിയെന്ന്‌ പോലീസ്‌ പറയുന്ന ചങ്ങനാശ്ശേരി തൃക്കൊടിത്താനം പ്ലാമ്പറമ്പില്‍ സതീശന്‍ എന്ന കാരി സതീശനെ (26) ചൊവ്വാഴ്‌ച അറസ്റ്റുചെയ്‌തു. കോട്ടയം ഡി.വൈ.എസ്‌.പി. പി.കെ. മധുവിന്റെ നേതൃത്വത്തില്‍ പായിപ്പാട്ടെ വീട്ടില്‍ നിന്ന്‌ കസ്റ്റഡിയിലെടുത്ത പ്രതിയെ പുളിങ്കുന്ന്‌ സി.ഐ. വിശ്വനാഥന്‍ ഏറ്റുവാങ്ങി ആലപ്പുഴയില്‍ കൊണ്ടുവന്നു. കൊലപാതകത്തെ തുടര്‍ന്ന്‌ ചവറയില്‍ ഉപേക്ഷിക്കപ്പെട്ട എന്‍ഡവര്‍ കാര്‍ കൊണ്ടുപോകാന്‍ എത്തിയശേഷം മുങ്ങിയ മൂന്നുപേരെ തിരുവനന്തപുരത്തുനിന്ന്‌ പോലീസ്‌ കസ്റ്റഡിയിലെടുത്തിട്ടുണ്ട്‌. ഗുണ്ടാസംഘത്തലവന്‍ അജേഷ്‌ പുത്തന്‍പാലത്തിന്റെ കൂട്ടാളികളായ കണ്ണമ്മൂല സ്വദേശികളായ അനുരാജ്‌, ബിനുരാജ്‌, ബിനു എന്നിവരാണ്‌ കസ്റ്റഡിയിലായിട്ടുള്ളത്‌. ഗുണ്ടാസംഘം നേതാക്കളായ ഒാംപ്രകാശിനും രാജേഷ്‌ പുത്തന്‍പാലത്തിനും വേണ്ടിയുള്ള തിരച്ചില്‍ തുടരുകയാണ്‌.

സംഭവവുമായി ബന്ധപ്പെട്ട്‌ പത്തോളം പേരെ ചൊവ്വാഴ്‌ച ആലപ്പുഴ പോലീസ്‌ ക്ലബ്ബില്‍ പോലീസ്‌ ചോദ്യംചെയ്‌തു. പോളിന്റെ കാറിടിച്ച്‌ പരിക്കേറ്റ ആലപ്പുഴ സ്വദേശി ബിജുവിനെ (30) പോലീസ്‌ വീണ്ടും ചോദ്യംചെയ്‌തു.

സംഭവം നടന്ന്‌ നാലുദിവസം പിന്നിട്ടിട്ടും കേസന്വേഷണത്തിലെ ദുരൂഹത തുടരുകയാണ്‌. പോളിനെ കുത്തിയ ആളെന്ന്‌ സംശയിക്കുന്ന കാരി സതീശ്‌ ചൊവ്വാഴ്‌ച കാലത്തുതന്നെ പോലീസ്‌ കസ്റ്റഡിയിലായതായി അഭ്യൂഹമുണ്ടായിരുന്നു. അഭിഭാഷകന്‍ വഴി കീഴടങ്ങാനെത്തിയ സതീശനെ പോലീസ്‌ കസ്റ്റഡിയിലെടുത്തതായിട്ടായിരുന്നു വിവരം. അതെല്ലാം നിഷേധിച്ചുകൊണ്ടിരുന്ന പോലീസ്‌ വൈകീട്ട്‌ നാലുമണിയോടെ ചങ്ങനാശ്ശേരിക്ക്‌ സമീപം പായിപ്പാട്ട്‌ തുരുത്തിക്കടവിലെ വാടകവീട്ടിലെത്തി സതീശനെ കസ്റ്റഡിയിലെടുത്തു.

ചങ്ങനാശ്ശേരി ക്വട്ടേഷന്‍ സംഘവും പോളുമായി പൊങ്ങ ജ്യോതി ജംഗ്‌ഷനില്‍ സംഘര്‍ഷമുണ്ടായപ്പോള്‍ കത്തികൊണ്ട്‌ കുത്തിയത്‌ കാരി സതീശനാണെന്നാണ്‌ പോലീസിന്‌ ലഭിച്ച വിവരം. 'എസ്‌' ആകൃതിയിലുള്ള കത്തികൊണ്ട്‌ നാല്‌ കുത്താണ്‌ പോളിന്റെ പുറത്തുണ്ടായിരുന്നത്‌. ഒരാള്‍ മാത്രമേ ആയുധം പ്രയോഗിച്ചിട്ടുള്ളൂ എന്നും പോലീസ്‌ പറയുന്നു. കിണര്‍ പണിക്കാരനായ സതീശന്‌ കാര്യമായ ക്രിമിനല്‍ പശ്ചാത്തലമൊന്നുമില്ല.

സതീശന്‌ പുറമെ ചങ്ങനാശ്ശേരി ക്വട്ടേഷന്‍ സംഘത്തിലെ 11 പേരെ തിങ്കളാഴ്‌ച അറസ്റ്റ്‌ ചെയ്‌തിരുന്നു. തിങ്കളാഴ്‌ച രാത്രി രാമങ്കരി മജിസ്‌ട്രേട്ടിന്റെ വസതിയില്‍ ഹാജരാക്കിയ ഇവരെ സപ്‌തംബര്‍ 5 വരെ റിമാന്‍ഡ്‌ ചെയ്‌തിട്ടുണ്ട്‌. ബുധനാഴ്‌ച ഇവരെ വീണ്ടും പോലീസ്‌ കസ്റ്റഡിയില്‍ വാങ്ങുമെന്നറിയുന്നു. കേസില്‍ 22 പ്രതികളുണ്ടെന്നാണ്‌ പോലീസിന്റെ പ്രാഥമിക നിഗമനം. ഇനി 10 പേരെ കൂടി കിട്ടാനുണ്ട്‌.

മെക്കാനിക്കുകളെന്ന്‌ പറഞ്ഞ്‌ ചവറയില്‍ നിന്ന്‌, വഴിയോരത്ത്‌ കിടന്ന എന്‍ഡവര്‍ കാര്‍ എടുത്തുകൊണ്ടു പോകാനെത്തിയ മൂന്നുപേരെ നേരത്തെ പോലീസ്‌ വിട്ടയച്ചിരുന്നു. ഈ സംഭവം വിവാദമായതിനെ തുടര്‍ന്ന്‌ ഇവരെ കസ്റ്റഡിയിലെടുക്കാനുള്ള ശ്രമത്തിലായിരുന്നു പോലീസ്‌. ചൊവ്വാഴ്‌ച കാലത്താണ്‌ ഇവര്‍ കസ്റ്റഡിയിലായത്‌.

ചങ്ങനാശ്ശേരി ക്വട്ടേഷന്‍ സംഘം സഞ്ചരിച്ച രണ്ട്‌ ടെമ്പോ ട്രാവലറുകള്‍ ആലപ്പുഴയില്‍ ഒരു വ്യക്തിയുടേതാണ്‌. പോലീസ്‌ കസ്റ്റഡിയിലുള്ള ഈ വണ്ടികള്‍ ഓടിച്ചവരേയും കസ്റ്റഡിയിലെടുത്തതായി സൂചനയുണ്ട്‌. അന്വേഷണ വിവരങ്ങളെല്ലാം പോലീസ്‌ രഹസ്യമാക്കി വച്ചിരിക്കുകയാണ്‌. അന്വേഷണ പുരോഗതിയെ ബാധിക്കുമെന്നു പറഞ്ഞ്‌ വിവരങ്ങളൊന്നും പുറത്തേക്ക്‌ വിടുന്നില്ല.

ഓംപ്രകാശിനെ തിരയാന്‍ നോട്ടീസ്‌; സി.പി.എം. ചങ്ങാത്തം രക്ഷാകവചം - 25 aug

Date : August 25 2009 (mbi)


തിരുവനന്തപുരം: കുപ്രസിദ്ധ ഗുണ്ട ഓംപ്രകാശിനെതിരെ സംസ്ഥാന പോലീസ്‌ ഒടുവില്‍ ലുക്ക്‌ ഔട്ട്‌ നോട്ടീസ്‌ പുറപ്പെടുവിച്ചു. തലസ്ഥാനത്ത്‌ ഗുണ്ടാ പട്ടികയില്‍ ഉള്‍പ്പെടുത്തിയ ഓംപ്രകാശടക്കം 18 പേരെ ഇനിയും പിടികിട്ടാനുണ്ട്‌. ഇതില്‍ ഏറ്റവും പഴക്കമുള്ള കേസ്‌ ഓംപ്രകാശിന്‍േറതാണ്‌. രാജ്യത്തിന്റെ എല്ലാ വിമാനത്താവളങ്ങളിലും ജാഗ്രത പാലിക്കണമെന്ന നിര്‍ദ്ദേശത്തോടെയാണ്‌ ലുക്ക്‌ഔട്ട്‌ നോട്ടീസ്‌ നല്‍കിയിരിക്കുന്നത്‌. ഫോട്ടോയടക്കമുള്ള വിവരങ്ങളാണ്‌ കൈമാറിയിട്ടുള്ളത്‌. അതേസമയം, സി. പി. എമ്മിന്റെ മുന്നു പ്രാദേശിക നേതാക്കളുടെ വാറണ്ട്‌ കാലാവധി നീട്ടികിട്ടുന്നതിന്‌ പോലീസ്‌ നടപടിയൊന്നും എടുത്തിട്ടില്ലെന്ന ആരോപണം ശക്തമായിട്ടുണ്ട്‌.

രണ്ടു കൊല്ലമായി പോലീസ്‌ തിരയുന്ന ഓംപ്രകാശിനെ കരുതല്‍ തടങ്കലില്‍ വെക്കാന്‍ ഉത്തരവിട്ടത്‌ 2007 ജൂണ്‍ 13-നാണ്‌. വിദേശത്തും നാട്ടിലുമായി കറങ്ങി നടന്ന ഒാംപ്രകാശിന്റെ പേര്‌ ആലപ്പുഴയില്‍ പോള്‍ ജോര്‍ജ്ജിന്റെ കൊലക്കേസ്സുമായി ബന്ധപ്പെട്ടാണ്‌ വീണ്ടും സജീവമായത്‌. മുത്തൂറ്റ്‌ പോള്‍ ജോര്‍ജിനോടൊപ്പം ഗുണ്ടാ ലിസ്റ്റില്‍പ്പെട്ട രണ്ട്‌ ക്രിമിനലുകള്‍ ഉണ്ടായിരുന്നു എന്ന വിവരം പുറത്തുവന്നതോടെയാണ്‌ പെട്ടെന്ന്‌ ലുക്ക്‌ ഔട്ട്‌ നോട്ടീസ്‌ പുറത്തിറക്കാന്‍ പോലീസ്‌ തയ്യാറായത്‌. പോലീസ്‌ ഉദ്യോഗസ്ഥരും രാഷ്ട്രീയക്കാരുമായുള്ള ചങ്ങാത്തമാണ്‌ ഓംപ്രകാശിന്‌ തുണയായത്‌. ഗുണ്ടാ ലിസ്റ്റില്‍ ഉള്‍പ്പെട്ടാല്‍ ലുക്ക്‌ ഔട്ട്‌ നോട്ടീസ്‌ പുറപ്പെടുവിക്കണമെന്നാണ്‌ വ്യവസ്ഥ. എന്നാല്‍ ഓംപ്രകാശിന്റെ കാര്യത്തില്‍ അതുണ്ടായില്ല. ഇതുകാരണം വിമാനത്താവളങ്ങളിലൂടെ പല തവണ കടന്നുപോയി. എമിഗ്രേഷന്‍ വിഭാഗത്തിന്റെ സഹായവും ലഭിച്ചിരുന്നു. വിവിധ പേരുകളില്‍ ഓംപ്രകാശിന്‌ കുറഞ്ഞത്‌ അഞ്ച്‌ പാസ്‌പോര്‍ട്ടുകളെങ്കിലും ഉണ്ടെന്നാണ്‌ പോലീസിന്റെ വിലയിരുത്തല്‍.

ഒരിക്കല്‍ വാറണ്ട്‌ പുറപ്പെടുവിച്ചാല്‍, ആറു മാസം മാത്രമേ നിലനില്‍ക്കുകയുള്ളു. അതിനുശേഷം വീണ്ടും അപേക്ഷ നല്‍കണമെന്നാണ്‌ വ്യവസ്ഥ. എന്നാല്‍, ഓംപ്രകാശ്‌ ഉള്‍പ്പെടെ സി.പി.എം. നേതൃത്വവുമായി ബന്ധമുള്ള നിരവധി ഗുണ്ടകളുടെ വാറണ്ട്‌ നീട്ടിക്കിട്ടുന്നതിന്‌ പോലീസ്‌ അപേക്ഷ നല്‍കിയിട്ടില്ല. ആറു മാസം മുമ്പ്‌ കളക്ടര്‍ ഒപ്പിട്ട ഗുണ്ടാ പട്ടികയില്‍ സി.പി.എമ്മിന്റെ മൂന്നു പ്രാദേശിക നേതാക്കള്‍ ഉള്‍പ്പെട്ടിരുന്നു. ഇവരുടെ വാറണ്ട്‌ കാലാവധി കഴിയാറായെങ്കിലും നീട്ടിക്കിട്ടുന്നതിനോ സ്വത്തുക്കള്‍ കണ്ടുകെട്ടുന്നതിനോ ശ്രമം നടത്തിയിട്ടില്ല. വിദേശത്ത്‌ പോയെന്ന്‌ പോലീസ്‌പ്രചരിപ്പിച്ചിരുന്ന ഓംപ്രകാശാണ്‌ ഇപ്പോള്‍, ആലപ്പുഴയില്‍ കൊല ചെയ്യപ്പെട്ട വ്യവസായിയോടൊപ്പം ഉണ്ടായിരുന്നുവെന്ന്‌ തെളിഞ്ഞിരിക്കുന്നത്‌. സി. പി. എമ്മിന്റെ പ്രാദേശിക നേതാക്കളായ എയര്‍പോര്‍ട്ട്‌ ശ്യാം, വഞ്ചിയൂര്‍ ഹരിപ്രസാദ്‌, ചുക്രന്‍ രഞ്‌ജിത്‌ എന്നിവരുടെ വാറണ്ട്‌ പുതുക്കാന്‍ പോലീസ്‌ നടപടിയില്ലെന്നും ആക്ഷേപമുണ്ട്‌.

ഓംപ്രകാശിനൊപ്പം ഗുണ്ടാ പട്ടികയിലുള്ള പുത്തന്‍പാലം രാജേഷിനെതിരെ നടപടി തുടരാന്‍ പോലീസ്‌ തയ്യാറായിട്ടില്ലെന്നും പരാതിയുണ്ട്‌.

ക്വട്ടേഷന്‍ സംഘത്തലവന്മാര്‍ക്ക്‌ പോളുമായുള്ള ബന്ധം കണ്ടെത്താന്‍ അന്വേഷണം തുടരും - 25 aug

Date : August 25 2009 (Mbi)

ആലപ്പുഴ: കൊല്ലപ്പെട്ട പോള്‍ എം. ജോര്‍ജിന്‌ ക്വട്ടേഷന്‍ സംഘത്തലവന്മാരായ ഒാംപ്രകാശ്‌, രാജേഷ്‌ പുത്തന്‍പാലം, ക്രിമിനല്‍ സംഘവുമായി ബന്ധമുള്ള മനു എന്നിവരുമായി എന്താണ്‌ ബന്ധമെന്ന ചോദ്യത്തിന്‌ പോലീസിന്‌ ഉത്തരം നല്‍കാനായിട്ടില്ല. ക്രിമിനലുകള്‍ക്ക്‌ പോളുമായുള്ള ബന്ധം തുടര്‍ന്ന്‌ നടക്കുന്ന അന്വേഷണത്തിലേ വ്യക്തമാവൂ എന്നാണ്‌ ഐ.ജി. വിന്‍സന്‍ എം. പോളിന്റെ മറുപടി. ഒാംപ്രകാശിനേയും രാജേഷിനേയും പിടികിട്ടിയാലേ ചിത്രം തെളിയൂ.

ഇവര്‍ നാലുപേരും ഒരുമിച്ചാണ്‌ യാത്ര ചെയ്‌തതെന്ന്‌ പോലീസ്‌ സ്ഥിരീകരിക്കുന്നുണ്ട്‌. ഫോര്‍ഡ്‌ എന്‍ഡവര്‍, സ്‌കോര്‍പ്പിയോ എന്നീ കാറുകളില്‍ ആരൊക്കെയായിരുന്നുവെന്നും കണ്ടെത്താന്‍ കഴിഞ്ഞിട്ടില്ല. ഫോര്‍ഡ്‌ കാര്‍ ഓടിച്ചിരുന്നത്‌ പോള്‍. സ്‌കോര്‍പ്പിയോ ഓടിച്ചിരുന്നത്‌ പോളിന്റെ ഡ്രൈവര്‍ ഷിബു. സ്‌കോര്‍പ്പിയോ കാര്‍ പിന്നിലും മറ്റേ കാര്‍ മുന്നിലുമായിട്ടായിരുന്നു യാത്ര.

രാജേഷും മനുവും ആണ്‌ പോളുമായി ആദ്യം സന്ധിച്ചത്‌. എവിടെവെച്ചാണ്‌ ഇവര്‍ ഒന്നിച്ചതെന്ന്‌ പോലീസ്‌ വെളിപ്പെടുത്തുന്നില്ലെങ്കിലും കോയമ്പത്തൂരില്‍ വെച്ചാണെന്നാണ്‌ സൂചന. തുടര്‍ അന്വേഷണത്തെ ബാധിക്കുമെന്നതിനാലാണ്‌ എവിടെ വെച്ച്‌ സന്ധിച്ചുവെന്ന്‌ വെളിപ്പെടുത്താത്തതെന്ന്‌ പോലീസ്‌ ഭാഷ്യമുണ്ട്‌. അതേസമയം ഒാംപ്രകാശ്‌ തൃശ്ശൂരില്‍ വെച്ചാണ്‌ സംഘത്തോടൊപ്പം കൂടിയതെന്ന്‌ പോലീസ്‌ പറയുന്നു.

എറണാകുളത്തുള്ള പോളിന്റെ ജ്യേഷുന്‍ ജോര്‍ജിന്റെ വീട്ടില്‍ സംഘം ചെന്നിരുന്നു. പോള്‍ മാത്രമേ അകത്തുകയറിയുള്ളൂ. മറ്റുള്ളവര്‍ പുറത്തുനില്‍ക്കുകയായിരുന്നു. തുടര്‍ന്ന്‌ രണ്ട്‌ കാറുകളും ആലപ്പുഴ ഭാഗത്തേക്ക്‌ തിരിച്ചു. മാരാരിക്കുളത്ത്‌ പോളിന്റെ ചുമതലയില്‍ നിര്‍മാണം നടക്കുന്ന റിസോര്‍ട്ടിന്റെ പുരോഗതി വിലയിരുത്തിയ ശേഷം അവിടെ നിന്ന്‌ ഭക്ഷണം കഴിച്ച്‌ ആലപ്പുഴയിലെത്തി ചങ്ങനാശ്ശേരി ഭാഗത്തേക്കുള്ള എ.സി. റോഡിലൂടെ രാത്രി യാത്ര തുടര്‍ന്നു. പള്ളാത്തുരുത്തി പാലത്തിന്‌ സമീപംവെച്ചാണ്‌ ആലപ്പുഴ സ്വദേശി ബിജുവിന്റെ ബുള്ളറ്റ്‌ മോട്ടോര്‍ സൈക്കിളില്‍ പോള്‍ ഓടിച്ചിരുന്ന ഫോര്‍ഡ്‌ കാര്‍ തട്ടുന്നതെന്നും തുടര്‍ന്ന്‌ കൊലപാതകം ഉണ്ടായതെന്നും പോലീസ്‌ പറയുന്നു.

പോളിനൊപ്പം ഉണ്ടായിരുന്ന മനുവിന്റെ മൊഴിയുടെ ചുവടുപിടിച്ചാണ്‌ പോലീസ്‌ പോളിന്‌ ക്രിമിനലുകളുമായുള്ള ബന്ധം കണ്ടുപിടിക്കാന്‍ ശ്രമിക്കുന്നത്‌. കുത്തേറ്റ്‌ നിസ്സാര പരിക്കേറ്റ മനു ആലപ്പുഴ മെഡിക്കല്‍ കോളേജ്‌ ആസ്‌പത്രിയില്‍ ചികിത്സയിലാണ്‌. പോളും താനും മാത്രമേ കാറില്‍ ഉണ്ടായിരുന്നുള്ളൂ എന്നാണ്‌ മനു ആദ്യം നല്‍കിയ മൊഴി. ഗുണ്ടാത്തലവന്മാരായ ഒാംപ്രകാശിന്റെയും രാജേഷിന്റെയും സാന്നിധ്യം മറച്ചുപിടിക്കാന്‍ മനു ബോധപൂര്‍വം ശ്രമിച്ചിരുന്നുവെന്നും വിശദമായ ചോദ്യംചെയ്യലിലാണ്‌ ഇവരുടെ പേരുകള്‍ പുറത്തുവന്നതെന്നും ഐജി വിന്‍സന്‍ എം. പോള്‍ വ്യക്തമാക്കി.

പോളിനെയും സംഘത്തെയും ആക്രമിക്കുമ്പോള്‍ ഒാംപ്രകാശിനും രാജേഷിനും പരിക്കേറ്റിട്ടുണ്ടോ എന്നു പോലീസിന്‌ വ്യക്തമല്ല. പോള്‍ ഓടിച്ചിരുന്ന ഫോര്‍ഡ്‌ എന്‍ഡവര്‍ കാര്‍ തിരുവനന്തപുരം സ്വദേശി ജോണ്‍ എന്നയാളുടെ പേരിലാണ്‌ രജിസ്റ്റര്‍ചെയ്‌തിട്ടുള്ളതെങ്കിലും മേല്‍വിലാസം തെറ്റായതിനാല്‍ വ്യാജ രജിസ്‌ട്രേഷനാണ്‌. പോളിന്റെ പക്കല്‍ ഈ കാര്‍ എങ്ങനെ വന്നുവെന്ന്‌ വ്യക്തമല്ല. ഒാംപ്രകാശോ രാജേഷോ ഈ കാര്‍ കൊണ്ടുവന്നതായിരിക്കാമെന്ന്‌ പോലീസ്‌ കരുതുന്നു. നീണ്ടകരയില്‍നിന്ന്‌ കണ്ടെടുത്ത കാറില്‍നിന്ന്‌ ഒാംപ്രകാശിന്റെ ഡ്രൈവിങ്‌ ലൈസന്‍സ്‌ കണ്ടുകിട്ടിയിരുന്നു. കാറിനുള്ളില്‍നിന്ന്‌ ഒരു ചെറിയ ബാഗ്‌മാത്രമേ കിട്ടിയിട്ടുള്ളുവെന്ന്‌ പോലീസ്‌ പറയുന്നു. അതില്‍ ടൂത്ത്‌ബ്രഷും ടൂത്ത്‌പേസ്റ്റും ഷേവിങ്‌സെറ്റും മറ്റുമായിരുന്നത്രെ. സംഭവസ്ഥലത്തുനിന്ന്‌ ഫോര്‍ഡ്‌ എന്‍ഡവര്‍ കാര്‍ ഓടിച്ചുകൊണ്ടുപോയി നീണ്ടകരയില്‍ ഉപേക്ഷിച്ചത്‌ തെളിവുനശിപ്പിക്കാന്‍ ഗുണ്ടാത്തലവന്മാര്‍ ശ്രമിച്ചതായിരിക്കാമെന്ന്‌ പോലീസ്‌ സംശയിക്കുന്നുണ്ട്‌. കാറില്‍ രക്തക്കറ കണ്ടത്‌ സംബന്ധിച്ച്‌ ഇനിയും അന്വേഷണം നടക്കേണ്ടിയിരിക്കുന്നു. കാറിന്‌ പുറത്തുവെച്ചാണ്‌ പോളിനെ കൊലചെയ്‌തതെന്നാണ്‌ ഇപ്പോഴത്തെ നിഗമനം.

ഗുണ്ടാത്തലവന്മാരെ തേടിയുള്ള അന്വേഷണത്തില്‍ രാഷ്ട്രീയസമ്മര്‍ദമില്ലെന്ന്‌ ഐജി വ്യക്തമാക്കി. മുന്‍പ്‌ ഡിവൈഎഫ്‌ഐയില്‍ സജീവമായിരുന്ന ഒാംപ്രകാശിന്‌ സിപിഎമ്മിലെ ചില ഉന്നതകേന്ദ്രങ്ങളുമായി ബന്ധമുണ്ടെന്ന്‌ ആക്ഷേപമുണ്ടായിരുന്നു. ഒാംപ്രകാശും രാജേഷും കാര്‍ നീണ്ടകരയില്‍ ഉപേക്ഷിച്ചശേഷം എങ്ങോട്ടുപോയി എന്നതിനെക്കുറിച്ച്‌ അന്വേഷണസംഘത്തിന്‌ യാതൊരു സൂചനയും ലഭിച്ചിട്ടില്ലെന്നാണ്‌ വിവരം. വേണ്ടിവന്നാല്‍ കേരളത്തിനു പുറത്തേക്കും അന്വേഷണം വ്യാപിപ്പിക്കും.

ഒാംപ്രകാശിനെയും രാജേഷിനെയും കുറിച്ച്‌ മനു ചില കാര്യങ്ങള്‍ വെളിപ്പെടുത്തിയിട്ടുണ്ടെങ്കിലും അന്വേഷണത്തെ ബാധിക്കുമെന്നതിനാല്‍ ഇപ്പോള്‍ അക്കാര്യം പറയാന്‍ പറ്റില്ലെന്നാണ്‌ പോലീസിന്റെ നിലപാട്‌. ഗുണ്ടാത്തലവന്മാര്‍ സഞ്ചരിച്ചശേഷം ഉപേക്ഷിച്ച കാറിന്‌ കാര്യമായ തകരാറൊന്നുമില്ലെന്ന്‌ പോലീസ്‌ പറഞ്ഞു. മനുവിന്റെ റെന്റ്‌ എ കാര്‍ ബിസിനസ്സിന്‌ പോളിന്റെ ഭാഗത്തുനിന്ന്‌ സഹായം ലഭിച്ചിരുന്നുവെന്ന്‌ മനു മൊഴി നല്‍കിയിട്ടുണ്ട്‌.

നീണ്ടകരയില്‍ ഉപേക്ഷിച്ച ഫോര്‍ഡ്‌ കാര്‍ എടുത്തുകൊണ്ടുപോവാന്‍ ശ്രമിച്ച വര്‍ക്‌ഷോപ്പ്‌ ജീവനക്കാര്‍ കാറിലുണ്ടായിരുന്ന ഒരു ബാഗ്‌ എടുത്തുകൊണ്ടുപോയി എന്ന വിവരം പോലീസിന്‌ ലഭിച്ചിട്ടുണ്ട്‌. ഈ ബാഗില്‍ എന്തായിരുന്നുവെന്ന്‌ വ്യക്തമല്ല.

ചങ്ങനാശ്ശേരിയിലെ ക്വട്ടേഷന്‍സംഘത്തിന്റെ ആലപ്പുഴയിലെ ദൗത്യം പോലീസ്‌ വെളിപ്പെടുത്തുന്നില്ല. വീട്‌ ആക്രമണം ഭയന്ന ഒരാളാണ്‌ കലവൂരിലുള്ള ഗുണ്ടകള്‍വഴി ചങ്ങനാശ്ശേരിസംഘത്തെ ഏര്‍പ്പാടാക്കിയതെന്നാണ്‌ സൂചന. ഇവര്‍ക്ക്‌ വരാന്‍ വാഹനം ഏര്‍പ്പാടാക്കിയതും ആലപ്പുഴയിലെ വ്യക്തിയാണെന്നാണ്‌ വിവരം.

പോള്‍ വധം: ഉത്തരം കിട്ടാത്ത ചോദ്യങ്ങള്‍ - 25 aug

Date : August 25 2009 (Mbi)

ആലപ്പുഴ: പോള്‍ വധക്കേസ്‌ സംബന്ധിച്ച്‌ പോലീസ്‌ വെളിപ്പെടുത്തിയ കഥയില്‍ സംശയങ്ങള്‍ ഏറെ ബാക്കി.

ആലപ്പുഴ - ചങ്ങനാശ്ശേരി റോഡില്‍ പള്ളാത്തുരുത്തിക്കും പൊങ്ങ ജംഗ്‌ഷനുമിടയില്‍ ഒരു വാഹനാപകടത്തെ തുടര്‍ന്നുള്ള സംഘര്‍ഷത്തിലാണ്‌ കൊലപാതകം നടക്കുന്നതെന്നാണ്‌ പോലീസ്‌ പറയുന്നത്‌. രണ്ടര കിലോമീറ്ററാണ്‌ ഈ സ്ഥലങ്ങള്‍ തമ്മിലുള്ള ദൂരം. പള്ളാത്തുരുത്തി വരെ പോള്‍ ഓടിച്ചിരുന്ന കാറിനെ അനുഗമിച്ചിരുന്ന സ്‌കോര്‍പ്പിയോ അവിടെ താക്കോല്‍ വാങ്ങാനായി നിര്‍ത്തുന്നു. ഏഴു മിനുട്ടിനുള്ളില്‍ ഈ വണ്ടിയില്‍ ഡ്രൈവര്‍ ഷിബു പൊങ്ങയിലെത്തുമ്പോള്‍ പോള്‍ കുത്തേറ്റുമരിച്ചു കഴിഞ്ഞു. പുറത്ത്‌ നാലു കുത്തേറ്റ പോള്‍ സംഭവസ്ഥലത്തു തന്നെ മരിച്ചതായിട്ടാണ്‌ വിവരം.

ഇതിനിടയ്‌ക്കുള്ള സമയത്താണ്‌ പള്ളാത്തുരുത്തിയില്‍ പോളിന്റെ വണ്ടി ബൈക്കിടിച്ചിടുന്നതും ടെമ്പോ ട്രാവലര്‍ പിന്നാലെയെത്തുന്നതും പൊങ്ങയില്‍ സംഘര്‍ഷമുണ്ടാകുന്നതും കൊല നടക്കുന്നതും. ഇത്ര ചുരുങ്ങിയ സമയത്തില്‍ ഇതെല്ലാം കൂടി നടക്കുമോ എന്നതാണ്‌ ലളിതമായ സംശയം.

ശാസ്‌ത്രീയ തെളിവുകളുടെ അടിസ്ഥാനത്തില്‍ അത്‌വിശ്വാസ്യമാണെന്നാണ്‌ ഐ.ജി. വിന്‍സന്‍ എം. പോള്‍ മാധ്യമ പ്രവര്‍ത്തകരോടു പറഞ്ഞത്‌.

പോളിനൊപ്പം എത്തിയിരുന്നവര്‍ എല്ലാം ക്വട്ടേഷന്‍ സംഘ നേതാക്കളാണ്‌. ഇവരെ ആക്രമിക്കുന്നത്‌ മറ്റൊരു ക്വട്ടേഷന്‍ സംഘവും. പോളിനൊപ്പമുണ്ടായിരുന്നവരും ആക്രമണം നടത്തിയവരും തമ്മില്‍ ബന്ധമുണ്ടായിക്കൂടെ?

ഐ.ജി.യുടെ മറുപടി ഇപ്രകാരം: ''ചങ്ങനാശ്ശേരിയിലെ ക്വട്ടേഷന്‍ സംഘം ആലപ്പുഴയില്‍ ഒരു ക്വട്ടേഷന്‍ ഏറ്റെടുത്തിരുന്നതു ചെയ്യാന്‍ വരുന്ന വഴിയായിരുന്നു. രണ്ടു ടെമ്പോ, ഒരു സാന്‍ട്രോ, ഒരു സ്‌കോര്‍പിയോ എന്നീ വാഹനങ്ങളിലാണു വന്നത്‌. പള്ളാത്തുരുത്തി ഭാഗത്ത്‌ ഒരു ടെമ്പോയുടെ ടയര്‍ ഊരിപ്പോയി. അതു മാറ്റിയിടുന്നതിനിടയിലാണ്‌ പോളിന്റെ വണ്ടി വരുന്നതും അപകടവും മറ്റും. ഈ സമയം ആലപ്പുഴ ഭാഗത്തേക്ക്‌ പാര്‍ക്കു ചെയ്‌തിരുന്ന വണ്ടികളിലൊന്നാണ്‌ തിരിച്ച്‌ പോളിന്റെ വണ്ടിക്കു പിന്നാലെ വിട്ടത്‌. ഇവര്‍ തമ്മില്‍ ബന്ധമുണ്ടോ എന്ന കാര്യം അന്വേഷിക്കും. ഇതേവരെ അതേപ്പറ്റി ഒരു സൂചനയുമില്ല''.

എന്‍ഡവര്‍ പോലെ അതിവേഗം പോകാന്‍ ശേഷിയുള്ള ഒരു വണ്ടിയുമായി ടെമ്പോ ട്രാവലര്‍ മത്സര ഓട്ടത്തിനു പോയി എന്നതിന്റെ വിശ്വാസ്യതയിലും അന്വേഷണസംഘത്തിനു സംശയമില്ല. എല്ലാവരും മദ്യലഹരിയിലായതിനാല്‍ അപ്രകാരം സംഭവിക്കാമെന്നാണ്‌ വിശദീകരണം.

അപകടമുണ്ടായതുമുതല്‍ കൊല നടക്കുന്നതു വരെയുള്ള സമയം ഡ്രൈവറുടെ വാഹനം അനുഗമിക്കാതിരിക്കാന്‍ കരുതിക്കൂട്ടി ചെയ്‌ത വിദ്യയായിരുന്നോ താക്കോലിനായി പറഞ്ഞുവിട്ടതെന്ന സംശയവും ബാക്കി. ചമ്പക്കുളം ഗസ്റ്റ്‌ ഹൗസിന്റെ താക്കോലിനായി ഡ്രൈവര്‍ ചെന്നപ്പോള്‍ ഗസ്റ്റ്‌ ഹൗസ്‌ തുറന്നുകിടപ്പുണ്ടെന്നാണ്‌ പള്ളാത്തുരുത്തി ഓഫീസില്‍ നിന്ന്‌ നല്‍കിയ മറുപടി.

കൊലപാതകത്തെ തുടര്‍ന്ന്‌ പോലീസ്‌ സംഭവ സ്ഥലത്തെത്തുമ്പോള്‍ പള്ളാത്തുരുത്തിയില്‍ ക്വട്ടേഷന്‍ സംഘത്തിന്റെ കേടായ ടെമ്പോ കിടപ്പുണ്ടായിരുന്നുവെന്ന്‌ ഐ.ജി. സമ്മതിക്കുന്നു. അല്‌പസമയത്തിനകം അതവിടെ നിന്ന്‌ കടത്തി. ഇത്‌ എന്തുകൊണ്ട്‌ പോലീസ്‌ അപ്പോള്‍ കസ്റ്റഡിയിലെടുത്തില്ല എന്ന ചോദ്യം അവശേഷിക്കുന്നു. കൊല്ലത്ത്‌ എന്‍ഡവര്‍ കൊണ്ടു പോകാനെത്തിയവരെ പോലീസ്‌ വിട്ടയച്ചതും ഇതിന്റെ അനുബന്ധം.

പോള്‍ വധം ക്വട്ടേഷന്‍ സംഘത്തിലെ 11 പേര്‍ അറസ്റ്റില്‍ - 25 -aug

Date : August 25 2009 (Mbi)

ആലപ്പുഴ: പോള്‍ എം. ജോര്‍ജ്‌ മുത്തൂറ്റിന്റെ കൊലപാതകവുമായി ബന്ധപ്പെട്ട്‌ ചങ്ങനാശ്ശേരിയില്‍ നിന്നുള്ള ക്വട്ടേഷന്‍ ഗുണ്ടാ സംഘത്തിലെ 11 പേരെ പോലീസ്‌ അറസ്റ്റ്‌ ചെയ്‌തു. കേസില്‍ 22 പ്രതികളുണ്ട്‌. പോളിനെ കുത്തിയ ആളടക്കം മറ്റ്‌ പ്രതികള്‍ക്കുവേണ്ടി അന്വേഷണം നടക്കുന്നു.

തിങ്കളാഴ്‌ച വൈകീട്ട്‌ ആലപ്പുഴ എസ്‌.പി. ഓഫീസില്‍ ഐ.ജി. വിന്‍സന്‍ എം. പോള്‍ പത്രസമ്മേളനത്തില്‍ അറിയിച്ചതാണീ കാര്യം.

വ്യവസായരംഗത്തെ പകയോ മുന്‍വൈരാഗ്യമോ ഒന്നുമല്ല കൊലയ്‌ക്ക്‌ പിന്നില്‍ എന്നാണ്‌ അന്വേഷണ സംഘത്തിന്റെ പ്രാഥമിക നിഗമനം. പോള്‍ ഓടിച്ചിരുന്ന കാര്‍ പള്ളാത്തുരുത്തിയില്‍ ഒരു മോട്ടോര്‍ ബൈക്ക്‌ യാത്രക്കാരനെ ഇടിച്ചു വീഴ്‌ത്തിയതിനെ തുടര്‍ന്നുണ്ടായ യാദൃച്ഛിക സംഭവങ്ങള്‍ കൊലപാതകത്തില്‍ കലാശിച്ചുവെന്നാണ്‌ ഐ.ജി. വിശദീകരിച്ചത്‌. ഇതേവരെയുള്ള അന്വേഷണത്തിന്റെ അടിസ്ഥാനത്തിലുള്ള നിഗമനമാണിത്‌. കൊലപാതകത്തിലേക്ക്‌ നയിക്കാവുന്ന മറ്റെല്ലാ സാധ്യതകളെപ്പറ്റിയും അന്വേഷിക്കുന്നുണ്ട്‌. കൊലപാതകം ആസൂത്രിതമാണോ എന്ന്‌ വീണ്ടും പരിശോധിക്കും.

പോളിനോടൊപ്പം ഉണ്ടായിരുന്ന തിരുവനന്തപുരത്തെ ക്വട്ടേഷന്‍ സംഘത്തലവന്മാരായ ഒാംപ്രകാശ്‌, രാജേഷ്‌ പുത്തന്‍പാലം എന്നിവര്‍ സംഭവത്തെ തുടര്‍ന്ന്‌ മുങ്ങിയിരിക്കുകയാണ്‌. ഇവര്‍ക്കുവേണ്ടി പോലീസ്‌ ഊര്‍ജിതമായ അന്വേഷണം നടത്തുന്നുണ്ട്‌. ഇവര്‍ക്ക്‌ സംഭവത്തില്‍ എന്തെങ്കിലും പങ്കുണ്ടോ എന്നും അന്വേഷിക്കും.

പോള്‍ വധം സംബന്ധിച്ച്‌ പോലീസ്‌ പറയുന്നതിപ്രകാരം: എറണാകുളത്തുനിന്ന്‌ എന്‍ഡവര്‍ കാറിലും പോളിന്റെ സ്‌കോര്‍പ്പിയോയിലുമായി പുറപ്പെട്ട സംഘത്തില്‍ പോളിനെയും ഡ്രൈവര്‍ ഷിബുവിനെയും കൂടാതെ ഉണ്ടായിരുന്നത്‌ ഗുണ്ടാ നേതാവ്‌ ഒാംപ്രകാശും രാജേഷ്‌ പുത്തന്‍പാലവും ഇവരുടെ കൂട്ടാളിയായ പ്രവീണ്‍ എന്ന മനുവുമാണ്‌. ഇവര്‍ മാരാരിക്കുളത്ത്‌ പോളിന്റെ ഉടമസ്ഥതയിലുള്ള റിസോര്‍ട്ടില്‍ കയറി ഭക്ഷണം കഴിച്ചശേഷം ചമ്പക്കുളത്ത്‌ മുത്തൂറ്റ്‌ ഗ്രൂപ്പിന്റെ ഗസ്റ്റ്‌ ഹൗസിലേക്ക്‌ പോകുന്നു. മുമ്പില്‍ പോള്‍ ഡ്രൈവുചെയ്യുന്ന എന്‍ഡവര്‍ കാറും പിന്നില്‍ ഡ്രൈവര്‍ ഓടിക്കുന്ന സ്‌കോര്‍പിയോയും. മനുവിനെ കൂടാതെ രാജേഷോ ഒാംപ്രകാശോ എന്ന്‌ തീര്‍ച്ചയില്ല, ഒരാള്‍ പോളിന്റെ കാറിലുണ്ടായിരുന്നു. മറ്റേയാള്‍ സ്‌കോര്‍പ്പിയോയിലും.

പള്ളാത്തുരുത്തിയിലുള്ള പോളിന്റെ ഹൗസ്‌ ബോട്ട്‌ ഓഫീസില്‍ നിന്ന്‌ ചമ്പക്കുളം ഗസ്റ്റ്‌ ഹൗസിന്റെ താക്കോല്‍ എടുത്തുവരാന്‍, പിന്നാലെ വന്ന ഡ്രൈവര്‍ക്ക്‌ പോള്‍ നിര്‍ദേശം നല്‍കി. താക്കോലിനായി അവിടെ വണ്ടി നിര്‍ത്തിയ ഡ്രൈവര്‍ അപ്പോള്‍ തന്നെ യാത്ര തുടരുന്നു.

ഇതിനിടെ പോളിന്റെ കാര്‍ ചങ്ങനാശ്ശേരി ഭാഗത്തേയ്‌ക്ക്‌ പോയ ബൈക്കുയാത്രക്കാരനെ ഇടിച്ചുവീഴ്‌ത്തിയിട്ട്‌ നിര്‍ത്താതെ പോയി. ചങ്ങനാശ്ശേരി ക്വട്ടേഷന്‍ സംഘം വന്ന ടെമ്പോ ട്രാവലര്‍ ഈ സമയം ടയര്‍ ഊരിപ്പോയതിനെ തുടര്‍ന്ന്‌ നന്നാക്കാന്‍ അവിടെ നിര്‍ത്തിയിട്ടിരിക്കുകയായിരുന്നു. ഒരാളുടെ ക്വട്ടേഷന്‍ ഏറ്റെടുത്ത്‌ ആലപ്പുഴയ്‌ക്ക്‌ വരികയായിരുന്നു സംഘം. ഇവരുടെ ദൗത്യം പോലീസ്‌ വ്യക്തമാക്കുന്നില്ല.

റോഡില്‍ തെറിച്ചുവീണ ബൈക്കുയാത്രികന്‍ ആലപ്പുഴ മുനിസിപ്പല്‍ ജില്ലാ കോടതി വാര്‍ഡില്‍ തൃച്ചീരി വീട്ടില്‍ ബിജു (30)വിനെ അവിടെയുണ്ടായിരുന്ന ക്വട്ടേഷന്‍ സംഘം ആണ്‌ ഓടിയെത്തി സഹായിച്ചത്‌.

രണ്ട്‌ ടെമ്പോ ട്രാവലറുകളിലും രണ്ട്‌ കാറുകളിലുമായെത്തിയ സംഘത്തില്‍പ്പെട്ട കുറേപ്പേര്‍ ഉടനെ ഒരു ടെമ്പോ ട്രാവലറില്‍ പോളിന്റെ വണ്ടിക്ക്‌ പിന്നാലെ പാഞ്ഞു. ബൈക്കുയാത്രക്കാരനെ ഇടിച്ചിട്ട്‌ നിര്‍ത്താതെ പോയത്‌ ചോദിക്കാനായിട്ടായിരുന്നു യാത്ര. രണ്ടര കി.മീ. അകലെ പൊങ്ങയില്‍ ഈസമയം പോള്‍, വണ്ടി റോഡിന്റെ ഇടതുഭാഗത്ത്‌ നിര്‍ത്തിയിട്ടിരിക്കുകയായിരുന്നു. ബൈക്കുമായുള്ള കൂട്ടിയിടിയില്‍ വണ്ടിക്ക്‌ വല്ലതും പറ്റിയോ എന്ന്‌ പരിശോധിച്ചുകൊണ്ടിരുന്ന പോളുമായി ടെമ്പോ ട്രാവലറില്‍ എത്തിയ സംഘം വാഗ്വാദത്തിലേര്‍പ്പെട്ടു. അത്‌ സംഘര്‍ഷത്തില്‍ കലാശിച്ചു. ഒപ്പമുണ്ടായിരുന്ന ഒരാള്‍ പോളിനെ കുത്തിവീഴ്‌ത്തി. പോളിന്‌ നാലുതവണ കുത്തേറ്റു.

ഇതിനിടയിലായിരിക്കണം കാറിലുണ്ടായിരുന്ന മനുവിന്റെ കൈയിലും ചെറിയ മുറിവുണ്ടായി. സംഭവമുണ്ടായി ആറേഴ്‌ മിനിട്ടിനുള്ളില്‍ സ്‌കോര്‍പ്പിയോയില്‍ ഡ്രൈവര്‍ ഷിബുവും ഗുണ്ടാ നേതാക്കളിലൊരാളും കൂടി സംഭവസ്ഥലത്തെത്തുന്നു. 'കയറി വിട്ടോടാ' എന്ന്‌ പറഞ്ഞ്‌ സംഘം ടെമ്പോ ട്രാവലറില്‍ കയറി ചങ്ങനാശ്ശേരി ഭാഗത്തേക്ക്‌ പോയി.

പതിനഞ്ചോളം പേരെ സംഭവസ്ഥലത്ത്‌ കണ്ടതായിട്ടാണ്‌ ഡ്രൈവര്‍ ഷിബുവും ദൃക്‌സാക്ഷിയായ മനുവും പറയുന്നത്‌.

ചങ്ങനാശ്ശേരി ക്വട്ടേഷന്‍ സംഘത്തില്‍ പെട്ടവരും പോളും മനുവും മദ്യപിച്ചിരുന്നതായി ഐ.ജി. പറഞ്ഞു. മദ്യലഹരിയിലായിരിക്കാം വേണ്ടപ്പെട്ടവരല്ലാഞ്ഞിട്ടും മോട്ടോര്‍ ബൈക്കുയാത്രക്കാരന്‌ വേണ്ടി ഇവര്‍ കാറിന്‌ പിന്നാലെ പാഞ്ഞത്‌.

പരിക്കേറ്റ ബൈക്കുയാത്രക്കാരന്‍ രാത്രിയില്‍ നെടുമുടി പോലീസ്‌ സ്റ്റേഷനില്‍ വിവരം റിപ്പോര്‍ട്ടു ചെയ്യുകയും രാത്രി പന്ത്രണ്ടരയോടെ ആലപ്പുഴ മെഡിക്കല്‍ കോളേജാസ്‌പത്രിയില്‍ ചികിത്സ തേടുകയും ചെയ്‌തിട്ടുണ്ട്‌. തൃക്കോടിത്താനത്ത്‌ ഭാര്യവീട്ടിലേക്ക്‌ പോകുമ്പോഴുണ്ടായ ഈ അപകടത്തെ തുടര്‍ന്ന്‌ കൊലപാതകം നടന്നത്‌ ഇയാള്‍ അറിഞ്ഞിട്ടില്ല. എഴുന്നേല്‍ക്കാന്‍ സഹായിച്ചത്‌ അവിടെ ഉണ്ടായിരുന്ന അജ്ഞാതരായിരുന്നുവെന്ന്‌ ഇയാള്‍ പോലീസിനോട്‌ പറഞ്ഞു. ഇവര്‍ ക്വട്ടേഷന്‍ സംഘാംഗങ്ങളായിരുന്നുവെന്നാണ്‌ പോലീസിന്റെ നിഗമനം.

ഈ സംഭവത്തില്‍ പോളിന്റെ ബന്ധുക്കളടക്കം ഇരുന്നൂറോളം പേരെ ചോദ്യം ചെയ്‌തതായി ഐ.ജി. പറഞ്ഞു. കേസിന്റെ തുടരന്വേഷണത്തില്‍ ലഭിക്കുന്ന വിവരങ്ങള്‍ അടിസ്ഥാനമാക്കി ഇതില്‍ എന്തെങ്കിലും ഗൂഢാലോചന നടന്നിട്ടുണ്ടോ, മറ്റാര്‍ക്കെങ്കിലും ഇതില്‍ പങ്കുണ്ടോ എന്നെല്ലാം അന്വേഷിക്കും.

അറസ്റ്റിലായ പ്രതികള്‍

പോള്‍ വധക്കേസില്‍ അറസ്റ്റിലായ പ്രതികള്‍ ചങ്ങനാശ്ശേരി, തിരുവല്ല, ആലപ്പുഴ, കുന്നന്താനം, നാലുകോടി, തൃക്കൊടിത്താനം ഭാഗത്തുള്ളവരാണ്‌. ഇവരെല്ലാം ചങ്ങനാശ്ശേരി ക്വട്ടേഷന്‍ സംഘത്തില്‍ പെട്ടവരാണ്‌. പ്രായം 20നും 30നും ഇടയ്‌ക്ക്‌.

പേരുവിവരം: സത്താര്‍, രാജീവ്‌കുമാര്‍, ഷിനോ പോള്‍, ആകാശ്‌ സതീഷ്‌കുമാര്‍, സുനില്‍, നിബിന്‍, അനീഷ്‌കുമാര്‍, ബിനോയ്‌, മാര്‍ക്കോസ്‌, ജയിന്‍ ജോസ്‌, ജയചന്ദ്രന്‍.

ഗൂഢാലോചനയെപ്പറ്റി അന്വേഷിക്കും-ഡി.ജി.പി.

പോള്‍ ജോര്‍ജിന്റെ കൊലപാതകവുമായി ബന്ധപ്പെട്ട്‌ ഗൂഢാലോചന നടന്നിട്ടുണ്ടോയെന്ന്‌ അന്വേഷിക്കുമെന്ന്‌ ഡി.ജി.പി. ജേക്കബ്‌ പുന്നൂസ്‌ തിരുവനന്തപുരത്ത്‌ പറഞ്ഞു. ഗുണ്ടാത്തലവന്മാരായ ഒാംപ്രകാശിനും പുത്തന്‍പാലം രാജേഷിനും കൊല്ലപ്പെട്ട പോള്‍ ജോര്‍ജുമായുള്ള ബന്ധവും അന്വേഷിക്കുമെന്നും അദ്ദേഹം പറഞ്ഞു.

ഓംപ്രകാശിനെയും രാജേഷിനെയും തേടി പോലീസ്‌; കൂട്ടാളികള്‍ ഉടന്‍ പിടിയിലാകും. - 24 aug

Date : August 24 2009 (Mbi)

തിരുവനന്തപുരം: പോള്‍ എം.ജോര്‍ജിന്റെ കൊലപാതകവുമായി ബന്ധപ്പെട്ട്‌ ഗുണ്ടാത്തലവന്‍മാരായ ഓംപ്രകാശ്‌, പുത്തന്‍പാലം രാജേഷ്‌ എന്നിവരെയും കൂട്ടാളികളെയും കേന്ദ്രീകരിച്ച്‌ പോലീസ്‌ അന്വേഷണം തിരുവനന്തപുരത്ത്‌ ശക്തമാക്കി. ഇവര്‍ ഉപേക്ഷിച്ചെന്ന്‌ കരുതുന്ന കാര്‍ ശരിയാക്കാനെത്തിയ കുമാരപുരം സ്വദേശികളായ വിനുരാജ്‌, സഹോദരന്‍ അനുരാജ്‌, കണ്ണമ്മൂല സ്വദേശി വിനു എന്നിവരെയും തിരയുന്നു.

ദേശീയപാത- 47 ല്‍ ചവറ ടൈറ്റാനിയത്തിന്‌ സമീപം ഉപേക്ഷിക്കപ്പെട്ട നിലയില്‍ കണ്ട കാറിന്‌ സമീപത്ത്‌ നിന്നാണ്‌ മൂന്നു പേരും ചവറ പോലീസിന്റെ പിടിയിലായത്‌. എന്നാല്‍ കൊലപാതകവുമായി ബന്ധമുള്ള വാഹനമാണ്‌ ഇതെന്ന്‌ കണ്ടെത്തുന്നതിന്‌ മുമ്പ്‌ തന്നെ പോലീസ്‌ ഇവരെ വിട്ടയയ്‌ക്കുകയായിരുന്നു. ഗുണ്ടാത്തലവന്‍ പുത്തന്‍പാലം രാജേഷിന്റെ കൂട്ടാളികളാണ്‌ ഇവരെന്ന നിഗമനത്തിലാണ്‌ പോലീസ്‌. ഇവര്‍ക്കുപുറമേ ഒാംപ്രകാശുമായി ബന്ധമുണ്ടെന്ന്‌ സംശയിക്കുന്നവരെയും പോലീസ്‌ ചോദ്യം ചെയ്‌തുവരികയാണ്‌. ചവറയില്‍ വാഹനം ഉപേക്ഷിച്ച്‌ ഒാംപ്രകാശും രാജേഷും കടന്നുകളയുകയായിരുന്നുവെന്ന്‌ പോലീസ്‌ സംശയിക്കുന്നു.

പോള്‍ എം. ജോര്‍ജിന്‌ കുത്തേറ്റ ശേഷം കൂടെയുണ്ടായിരുന്ന ഗുണ്ടാത്തലവന്‍മാരായ ഒാംപ്രകാശും പുത്തന്‍പാലം രാജേഷും രക്ഷപ്പെട്ട കാര്‍ ചവറ ടൈറ്റാനിയത്തിന്‌ സമീപമാണ്‌ ഉപേക്ഷിക്കപ്പെട്ട നിലയില്‍ കണ്ടെത്തിയത്‌. ദുരൂഹ സാഹചര്യത്തില്‍ കാര്‍ കണ്ടെത്തിയതിനെ തുടര്‍ന്നാണ്‌ ചവറ പോലീസ്‌ സ്ഥലത്തെത്തിയത്‌. വാഹന ഉടമയുടെ നിര്‍ദേശത്തെ തുടര്‍ന്ന്‌ കാര്‍ വര്‍ക്ക്‌ഷോപ്പിലെത്തിക്കാന്‍ എത്തിയതാണെന്നാണ്‌ പിടികൂടിയവര്‍ പോലീസിനോട്‌ പറഞ്ഞത്‌. കുമാരപുരം സ്വദേശികളായ സഹോദരന്‍മാര്‍ ഇടതുപക്ഷ അനുഭാവ തൊഴിലാളി സംഘടനയുടെ പ്രവര്‍ത്തകരാണ്‌.

ഗുണ്ടാത്തലവന്‍ ഓംപ്രകാശ്‌ ഉപയോഗിച്ചിരുന്ന കാര്‍ ടൈറ്റാനിയം സ്വദേശിയായ ഷിബു ആന്റണി എന്ന ഒരാളുടെ പേരിലുള്ളതാണ്‌. ഇങ്ങനെയൊരാള്‍ ആ പ്രദേശത്തുള്ളതായി പോലീസിന്‌ കണ്ടെത്താന്‍ കഴിഞ്ഞിട്ടില്ല. വ്യാജ പേരിലാണ്‌ കാര്‍ രജിസ്റ്റര്‍ ചെയ്‌തിട്ടുള്ളതെന്ന്‌ പോലീസ്‌ സ്ഥിരീകരിച്ചത്‌ ഇതില്‍ നിന്നാണ്‌. പോളിനൊപ്പം പരിക്കേറ്റ മനു മുഖേനയാണ്‌ കാര്‍ ഒാംപ്രകാശിന്‌ ലഭിച്ചത്‌. തിരുവനന്തപുരം രജിസ്‌ട്രേഷനിലുള്ള വാഹനത്തിന്റെ രേഖകള്‍ വ്യാജമാണെന്ന്‌ ആര്‍.ടി. ഓഫീസില്‍ നടന്ന പരിശോധനയില്‍ കണ്ടെത്തിയിരുന്നു.

മനുവിന്‌ ജില്ലയില്‍ ക്രിമിനല്‍ കേസുകളില്ലെങ്കിലും ഇയാള്‍ ഗുണ്ടാസംഘങ്ങളുമായി അടുത്ത ബന്ധം പുലര്‍ത്തിയിരുന്നതായി കണ്ടെത്തിയിട്ടുണ്ട്‌. റെന്റ്‌ എ കാര്‍ ബിസിനസ്‌ നടത്തുന്ന ഇയാളുടെ കൈവശം ഇന്നോവ, മാരുതി തുടങ്ങിയ വാഹനങ്ങള്‍ ഉണ്ടായിരുന്നു. പുത്തന്‍പാലം രാജേഷിനുവേണ്ടി ഇയാള്‍ പണമിടപാട്‌ നടത്തിയിരുന്നതായും സൂചനയുണ്ട്‌. ഇയാളുടെ വീട്‌ ശനിയാഴ്‌ച പോലീസ്‌ പരിശോധിച്ചിരുന്നു. വാഹനക്കച്ചവടവുമായി ബന്ധപ്പെട്ട രേഖകളാണ്‌ ഇവിടെ നിന്നും ലഭിച്ചത്‌.

ബാംഗ്ലൂര്‍, കൊടൈക്കനാല്‍ തുടങ്ങിയ സ്ഥലങ്ങളിലെ ഒളിത്താവളങ്ങളില്‍ നിന്നും ഒാംപ്രകാശ്‌ ഇടയ്‌ക്കിടെ ജില്ലയില്‍ എത്തിയിരുന്നു. പുത്തന്‍പാലം രാജേഷിന്റെ നേതൃത്വത്തില്‍ ജില്ലയില്‍ നടന്ന ഗുണ്ടാ പ്രവര്‍ത്തനങ്ങള്‍ക്ക്‌ പിന്നില്‍ ഒാംപ്രകാശായിരുന്നു. ക്വട്ടേഷന്‍ സ്വീകരിക്കുന്നതിലും നടപ്പാക്കുന്നതിലും വിദഗ്‌ധനായ ഒാംപ്രകാശിന്‌ തുണയേകിയത്‌ ഉന്നത രാഷ്ട്രീയ ബന്ധങ്ങളായിരുന്നു.

കൊലപാതകത്തിന്‌ പിന്നില്‍ ജില്ലയിലെ ക്രിമിനലുകളുടെ സാന്നിധ്യം വെളിപ്പെട്ടതിനെ തുടര്‍ന്ന്‌ ദക്ഷിണമേഖലാ ഐ.ജി. വിന്‍സെന്റ്‌ എം.പോള്‍ ശനിയാഴ്‌ച രാത്രി തിരുവനന്തപുരത്ത്‌ എത്തിയിരുന്നു.

കാര്‍ കൊണ്ടുപോകാന്‍ വന്നവരെ വിട്ടയച്ച പോലീസ്‌ നടപടി വിവാദത്തില്‍ - 24 aug

Date : August 24 2009 (mbi)

കൊല്ലം: മുത്തൂറ്റ്‌ പോള്‍ എം.ജോര്‍ജ്ജ്‌ സഞ്ചരിച്ചിരുന്ന കാര്‍ നീണ്ടകര പുത്തന്‍തുറയില്‍നിന്ന്‌ കൊണ്ടുപോകാന്‍ ശ്രമിച്ചവരെ കസ്റ്റഡിയിലെടുത്തശേഷം വിട്ടയച്ച പോലീസ്‌ നടപടി വിവാദമാവുന്നു. തിരുവനന്തപുരം സ്വദേശികളായ ബിനു, ബിനുരാജ്‌, അനുരാജ്‌ എന്നിവരെയാണ്‌ പോലീസ്‌ വിട്ടയച്ചത്‌.

ദേശീയപാതയോരത്ത്‌ നീണ്ടകര പുത്തന്‍തുറ എ.എസ്‌.യു.പി. സ്‌കൂളിന്‌ എതിര്‍വശത്ത്‌ പഴയ റോഡിലാണ്‌ ഫോര്‍ഡ്‌ എന്‍ഡവര്‍ കാര്‍ കിടന്നത്‌.

ശനിയാഴ്‌ച രാവിലെ 5 മുതല്‍ ദുരൂഹസാഹചര്യത്തില്‍ പാര്‍ക്ക്‌ ചെയ്‌തിരുന്ന കാര്‍ ഒരു ക്വാളിസ്‌ കാറിലെത്തിയ മൂന്നംഗസംഘം കൊണ്ടുപോകാനുള്ള ശ്രമം തുടങ്ങിയതോടെ നാട്ടുകാരില്‍ ചിലര്‍ പോലീസില്‍ വിവരം അറിയിക്കുകയായിരുന്നു. ഉടന്‍ ചവറ എസ്‌.ഐ. എസ്‌.ഷുക്കൂറിന്റെ നേതൃത്വത്തില്‍ പോലീസ്‌ എത്തി. ക്വാളിസില്‍ എത്തിയവര്‍ ഫോര്‍ഡിന്റെ സര്‍വീസ്‌ സെന്ററില്‍നിന്ന്‌ എത്തിയവരാണെന്നാണ്‌ പോലീസിനോടു പറഞ്ഞത്‌. എന്നാല്‍ സര്‍വീസ്‌ സെന്ററിലെ യൂണിഫോം ഇല്ലാത്ത ഇവരെ വിശ്വസിക്കരുതെന്നും കാറില്‍ രക്തം പുരണ്ട പാടുകള്‍ കാണുന്നതായും തുറന്നു പരിശോധിക്കണമെന്നും നാട്ടുകാര്‍ പോലീസിനോട്‌ ആവശ്യപ്പെട്ടു.

ആലപ്പുഴയില്‍ കൊല്ലപ്പെട്ട വ്യവസായി സഞ്ചരിച്ചിരുന്ന കാര്‍ തിരുവനന്തപുരം ഭാഗത്തേക്ക്‌ കൊണ്ടുപോയിട്ടുള്ളതായി മാധ്യമങ്ങളില്‍ വാര്‍ത്തയുണ്ടെന്നും അതാണോ എന്ന്‌ പരിശോധിക്കണമെന്നും ആവശ്യപ്പെട്ട നാട്ടുകാരോട്‌ എസ്‌.ഐ. തട്ടിക്കയറിയതായും പറയപ്പെടുന്നു. തുടര്‍ന്ന്‌, പോലീസ്‌ കാര്‍ തുറന്നു നോക്കിയപ്പോള്‍ അതിനുള്ളില്‍ 4 എക്‌സിക്യൂട്ടീവ്‌ ബാഗുകള്‍, ഒരു ലേഡീസ്‌ ഹാന്‍ഡ്‌ ബാഗ്‌, ഡാഷ്‌ ബോക്‌സില്‍ കുറേ ഗുളികകള്‍ എന്നിവ ഉണ്ടായിരുന്നതായി നാട്ടുകാര്‍ പറയുന്നു. ബാഗുകളില്‍ ഒന്ന്‌ തുറന്നുനോക്കിയ എസ്‌.ഐ. ഉടന്‍ അത്‌ അടച്ചത്രെ.

തുടര്‍ന്ന്‌ മൂവര്‍സംഘത്തില്‍ ഒരാള്‍ സംസാരിച്ചുകൊണ്ടിരുന്ന മൊബൈല്‍ ഫോണ്‍ പിടിച്ചുവാങ്ങിയ എസ്‌.ഐ. ഫോണില്‍ സംസാരിച്ചു തുടങ്ങിയതോടെ ഫോണ്‍ കട്ടായതായും പിന്നീട്‌ പലതവണ വിളിച്ചിട്ടും കിട്ടിയില്ലെന്നും സംഭവസ്ഥലത്ത്‌ ഉണ്ടായിരുന്നവര്‍ പറയുന്നു.

തുടര്‍ന്ന്‌, കാറിലെ ബാഗുകളെല്ലാം ക്വാളിസിലേക്ക്‌ മാറ്റിയശേഷം സംഘാംഗങ്ങളില്‍ 2 പേരെ പോലീസ്‌ ജീപ്പിലും ഒരാളെ ക്വാളിസിലും കയറ്റി സ്റ്റേഷനിലേക്ക്‌ പോവുകയായിരുന്നെന്ന്‌ ദൃക്‌സാക്ഷികള്‍ പറയുന്നു. എന്‍ഡവര്‍ കാറും സ്റ്റേഷനിലേക്ക്‌ കൊണ്ടുപോയി. എന്നാല്‍ ക്വാളിസ്‌ വാനും ബാഗുകളും സംബന്ധിച്ച്‌ പിന്നീട്‌ ഒരു വിവരവും ഇല്ലാതായി.

കാര്‍ അപകടത്തില്‍പ്പെട്ടതാണെന്നും തങ്ങള്‍ ഫോര്‍ഡിന്റെ സര്‍വീസ്‌ സെന്ററില്‍നിന്നു വന്നവരാണെന്നും അവര്‍ പറഞ്ഞ കഥ പോലീസ്‌ കണ്ണടച്ച്‌ വിശ്വസിക്കുകയായിരുന്നെന്നാണ്‌ ആക്ഷേപം.

എന്നാല്‍ ആരോപണങ്ങളെല്ലാം പോലീസ്‌ നിഷേധിക്കുന്നു. കാറിനുള്ളില്‍ ബാഗുകള്‍ ഉണ്ടായിരുന്നതായുള്ള പ്രചാരണം ശരിയല്ലെന്നും ദുഷ്‌പ്രചാരണം മാത്രമാണെന്നും എസ്‌.ഐ. ഷുക്കൂര്‍ പറഞ്ഞു. തിരുവനന്തപുരത്തുനിന്ന്‌ എത്തിയ മൂന്നുപേര്‍ കാര്‍ മെക്കാനിക്കും സഹായികളുമാണെന്ന്‌ ബോധ്യപ്പെട്ടശേഷമാണ്‌ വിട്ടയച്ചതെന്നും അദ്ദേഹം പറഞ്ഞു.
 

blogger templates | Make Money Online