Sunday, October 5, 2008

വെളിയത്തിനെതിരെ എഐടിയുസി

മനോരമ, ഒക്ടോ.6, 2008
പാലക്കാട്: പ്രത്യേക സാമ്പത്തിക മേഖലയ്ക്ക് ഇടം നല്‍കിയാല്‍ കേരളം കലാപഭൂമിയാകുമെന്ന് പ്രഖ്യാപിച്ച സിപിഐ സംസ്ഥാന സെക്രട്ടറി വെളിയം ഭാര്‍ഗവന്റെ മൊഴിമാറ്റത്തില്‍ എഐടിയുസി സംസ്ഥാന സമ്മേളനം കലാപ കലുഷിതമായി. സര്‍ക്കാരിന്റെ ഭാഗമായ സിപിഐയും വര്‍ഗസംഘടനയായ എഐടിയുസിയും സെസ് വിവാദത്തില്‍ രണ്ടു തട്ടിലാണെന്ന് ഉറപ്പാക്കുന്നതായി സമ്മേളനം.

പാര്‍ട്ടി സെക്രട്ടറിയുടെ വാക്കുവിഴുങ്ങല്‍ തൊഴിലാളി സമൂഹത്തിനു നാണക്കേടുണ്ടാക്കിയെന്ന് പ്രവര്‍ത്തന റിപ്പോര്‍ട്ടിന്‍മേലുള്ള ചര്‍ച്ചകള്‍ക്കിടെ സമ്മേളന പ്രതിനിധികള്‍ കുറ്റപ്പെടുത്തി. വര്‍ഗ- ഭരണകൂട താല്‍പര്യങ്ങളുടെ ഏറ്റുമുട്ടല്‍ ശക്തമായി തുടരുന്നതിനിടെ സര്‍ക്കാരിനു വേണ്ടി മറുപടി പറയാന്‍ എഐടിയുസി മുന്‍ ജനറല്‍ സെക്രട്ടറി കൂടിയായ മന്ത്രി സി.ദിവാകരനെ ചുമതലപ്പെടുത്താന്‍ പാര്‍ട്ടി നേതൃത്വം നിര്‍ബന്ധിതമായി.

കേരളത്തില്‍ സെസ് വന്നാല്‍ അതിനെതിരെ ധീരമായി മുന്നോട്ടു പോകുമെന്ന എഐടിയുസി പ്രവര്‍ത്തന റിപ്പോര്‍ട്ടിലെ മുന്നറിയിപ്പിന്റെ ചുവടുപിടിച്ചായിരുന്നു തുടക്കം മുതല്‍ ചര്‍ച്ചകള്‍. റിപ്പോര്‍ട്ടിന്റെ കാച്ചിക്കുറുക്കിയുള്ള രൂപമായിരുന്നു വെളിയത്തിന്റെ കലാപ പ്രസ്താവന. അകാരണമായുണ്ടായ മൊഴിമാറ്റം റിപ്പോര്‍ട്ടിന്റെ അന്തസത്ത കെടുത്തിയെന്ന തരത്തിലായിരുന്നു പൊതുവേയുയര്‍ന്ന വികാരം.

സെസ് വിഷയത്തില്‍ എഐടിയുസിയുടെ അഭിപ്രായത്തോട് എന്നും അടുത്തു നിന്നിട്ടുള്ള വെളിയത്തിന്റെ മലക്കം മറിച്ചില്‍ ആലപ്പുഴയില്‍ നിന്നുള്ള പ്രതിനിധികളാണ് ആദ്യം
ഉന്നയിച്ചത്. പേര് പറയാതെയുള്ള പരാമര്‍ശങ്ങള്‍ പിന്നീട് ഗൌരവതരമായ ചര്‍ച്ചയ്ക്കു വഴിമാറുകയായിരുന്നു. പാര്‍ട്ടി സെക്രട്ടറി ആദ്യം പറഞ്ഞത് തൊഴിലാളിവര്‍ഗ നിലപാടാണെന്നും പിന്നെപ്പറഞ്ഞത് ഭരണകൂട നിലപാടാണെന്നുമായിരുന്നു അഭിപ്രായം.

രാവിലെ മുതല്‍ സെസില്‍ ചുറ്റിക്കറങ്ങിയ ചര്‍ച്ച എങ്ങുമെത്താതെ നീണ്ടതോടെ പാര്‍ട്ടി നിര്‍ദേശപ്രകാരം ഉച്ചയ്ക്ക് മന്ത്രി സി. ദിവാകരന്‍ സര്‍ക്കാര്‍ ഭാഗം വിശദീകരിച്ചു. സെസ് സംബന്ധിച്ച മന്ത്രിസഭയുടെ തീരുമാനത്തിലേക്ക് പ്രതിനിധികളുടെ ശ്രദ്ധ ക്ഷണിച്ച അദ്ദേഹം, വേണ്ടത്ര കരുതലോടെയാണ് സര്‍ക്കാരിന്റെ സെസ് നയത്തെ പാര്‍ട്ടി സമീപിക്കുന്നതെന്നു പറഞ്ഞു. സര്‍ക്കാരിന്റെ ഭാഗമായി നില്‍ക്കുമ്പോള്‍ പാര്‍ട്ടിക്കു ചില നിലപാടുകള്‍ സ്വീകരിക്കേണ്ടി വരുമെന്ന് ഓര്‍മിപ്പിക്കാനും മറന്നില്ല. അതിനിടെ പ്രവര്‍ത്തന റിപ്പോര്‍ട്ട് മാധ്യമങ്ങള്‍ക്ക് ചോര്‍ന്നുകിട്ടിയതിനെക്കുറിച്ച് അന്വേഷിക്കണമെന്നും ചിലര്‍ ആവശ്യപ്പെട്ടു.

സെസ് നടപ്പാക്കിയാല്‍ കേരളത്തില്‍ കലാപമുണ്ടാകുമെന്നായിരുന്നു വെള്ളിയാഴ്ച സമ്മേളനം ഉദ്ഘാടനം ചെയ്തു കൊണ്ടുള്ള പൊതുയോഗത്തില്‍ വെളിയം ഭാര്‍ഗവന്‍ പറഞ്ഞത്. എന്നാല്‍, ‘കലാപ” പ്രസ്താവന നടത്തിയില്ലെന്ന് പിറ്റേന്ന് വാര്‍ത്താസമ്മേളനം വിളിച്ചുകൂട്ടി അദ്ദേഹം അറിയിക്കുകയായിരുന്നു.

സിപിഎമ്മിന്റെ വര്‍ഗസംഘടനയായ സിഐടിയുവിനെതിരെ പരക്കെ വിമര്‍ശനമുയര്‍ന്നു. സംസ്ഥാനത്തെ നിര്‍മാണമേഖലയില്‍ സിഐടിയു കൈക്കൊള്ളുന്ന നിലപാടുകളാണ് വിമര്‍ശനവിധേയമായത്. തൊഴിലാളി യൂണിയന്‍ മനുഷ്യശേഷി വിതരണംചെയ്യുന്ന ഏജന്‍സിയായി മാറുന്നതു ഗുണകരമല്ലെന്ന് അഭിപ്രായമുയര്‍ന്നു. തൊഴില്‍ യൂണിയന് എന്ന വാദം ഉന്നയിച്ച് അസ്വസ്ഥതകള്‍ സൃഷ്ടിക്കുന്നത് തൊഴില്‍ സമാധാനവും വ്യവസായ വികസനവും തകര്‍ക്കുമെന്ന് സമ്മേളനം അംഗീകരിച്ച പ്രമേയത്തില്‍ പറയുന്നു.

വൈദ്യുതി ബോര്‍ഡിനെ സര്‍ക്കാര്‍ സ്ഥാപനമായി നിലനിര്‍ത്താന്‍ കഴിയുമോയെന്ന് പരിശോധിക്കണമെന്നും സമ്മേളനം ആവശ്യപ്പെട്ടു.

Saturday, October 4, 2008

വിജയന്‍ മാഷിനുമേല്‍ സമ്മര്‍ദ്ദം വി.എസ്‌.പക്ഷത്തുനിന്ന്‌ ആയിരുന്നു - പാഠം

മാതൃഭൂമി, ഒക്ടോ. 5, 2008

കൊല്ലം:എം.എന്‍.വിജയനെ 'പാഠം' മാസികയില്‍നിന്ന്‌ അടര്‍ത്തിമാറ്റുന്നതിന്‌ ശക്തമായ സമ്മര്‍ദ്ദം ചെലുത്തിയത്‌ സി.പി.എമ്മിലെ വി.എസ്‌.പക്ഷത്തുള്ളവരായിരുന്നെന്ന്‌ പുതിയ വെളിപ്പെടുത്തല്‍. പാഠത്തിന്റെ കഴിഞ്ഞദിവസം പുറത്തിറക്കിയ എം.എന്‍.വിജയന്‍ സ്‌മരണികയില്‍ പ്രൊഫ. എസ്‌.സുധീഷാണ്‌ ഈ ആരോപണം ഉന്നയിക്കുന്നത്‌.

പിണറായി വിജയനല്ല, ഐസക്കല്ല, വി.എസ്സിന്റെ ആള്‍ക്കാരാണ്‌ പാഠത്തിനെതിരെ മാഷിനുമേല്‍ വിട്ടുവീഴ്‌ചയില്ലാത്ത സമ്മര്‍ദ്ദം ചെലുത്തിക്കൊണ്ടിരുന്നത്‌-സുധീഷ്‌ പറയുന്നു. വി.എസ്സിനെ നേതാവായി ഉയര്‍ത്തിപ്പിടിക്കുന്ന ജനങ്ങളുടെ ആവേശമാണ്‌ പാഠം. പക്ഷേ, വി.എസ്സിന്റെ ഓഫീസിലെ രാഷ്ട്രതന്ത്രജ്ഞര്‍ പാഠത്തിനെതിരെ ഒളിപ്പോര്‌ നടത്തുകയായിരുന്നു. അത്‌ വിജയന്‍ മാഷ്‌ തന്റെ മാത്രം ദുഃഖമായി, രഹസ്യമായി മനസ്സില്‍ സൂക്ഷിച്ചുവെന്ന്‌ പാഠത്തില്‍ ചൂണ്ടിക്കാട്ടുന്നു.

അന്ന്‌ പ്രതിപക്ഷനേതാവായിരുന്ന വി.എസ്സിന്റെ അഡീഷണല്‍ പ്രൈവറ്റ്‌ സെക്രട്ടറി, ഇപ്പോള്‍ പാര്‍ട്ടിയില്‍നിന്ന്‌ പുറത്താക്കപ്പെട്ട ഷാജഹാനാണ്‌ ഈ നീക്കത്തിന്‌ പുറകിലുണ്ടായിരുന്നതെന്നും പാഠം കുറ്റപ്പെടുത്തുന്നു. മലപ്പുറം സമ്മേളനത്തിന്‌ മുമ്പുള്ള കണ്ണൂര്‍ സമ്മേളനത്തിന്‌ തൊട്ടുമുമ്പ്‌ ക്‌സാസിഫൈഡ്‌ ഭൂപടം ദുരുപയോഗപ്പെടുത്തുകയും കടത്തുകയും ചെയ്‌തത്‌ സംബന്ധിച്ച പത്രസമ്മേളനം നടത്താന്‍ എം.എന്‍.വിജയന്‍ തീരുമാനിച്ചിരുന്നു. പത്രസമ്മേളനം നടത്തിയാല്‍ പ്രശ്‌നം തമസ്‌കരിക്കാനാകാതെ വരുമെന്നും അതിന്റെ ഗൗരവം ബോധ്യപ്പെട്ടാല്‍ പാര്‍ട്ടിക്കുള്ളിലെ ഫ്രാങ്കി വിഭാഗത്തിന്റെ മുന്‍കൈ ഒടിയുമെന്നുമുള്ള കണക്കുകൂട്ടലായിരുന്നു ഉണ്ടായിരുന്നത്‌. എന്നാല്‍, രണ്ടുദിവസം മുമ്പ്‌ വി.എസ്സിന്റെ ഓഫീസില്‍നിന്ന്‌ ഷാജഹാന്‍ വിളിച്ച്‌ അത്‌ നടത്തുന്നതില്‍നിന്ന്‌ വിലക്കിയെന്ന്‌ പാഠം പറയുന്നു.

വിഭവ ഭൂപടത്തിന്റെ മറവില്‍ നിര്‍മ്മിച്ച ക്ലാസിഫൈഡ്‌ ഭൂപടങ്ങളാണ്‌ വാഗമണിലും ബിനാനിപുരത്തുമുള്ള രഹസ്യതാവളങ്ങളിലെത്തുന്നതിന്‌ വിദേശികള്‍ ഉപയോഗിച്ചതെന്നും പാഠം ആരോപിക്കുന്നു. അവരുടെ രാജ്യങ്ങളിലെ കോഡുകള്‍ ഉപയോഗിച്ച്‌ നിര്‍മ്മിച്ചവയാണവ. ഇന്ത്യയില്‍ ഉപയോഗിക്കുന്ന രീതി പ്രകാരം അവ വായിക്കാനാവില്ല. ഇസ്ല്‌ളാമാബാദിലും കറാച്ചിയിലും താവളങ്ങളുള്ള റിച്ചാര്‍ഡ്‌ ഫ്രാങ്കി ഇന്ത്യയ്‌ക്ക്‌ അപരിചിതമായ കോഡ്‌ ഉപയോഗിച്ച്‌ ഭൂപടങ്ങളുണ്ടാക്കിയെന്നാണ്‌ അര്‍ത്ഥം. ഡല്‍ഹിയിലും ബെംഗളുരുവിലും ബോംബ്‌ സ്‌ഫോടനം നടത്തുന്ന ഭീകരര്‍ക്ക്‌ വാഗമണിലും ബിനാനിപുരത്തും രഹസ്യതാവളങ്ങളില്‍ എത്തിച്ചേരുന്നതിന്‌ മാത്രമല്ല, ശത്രുരാജ്യങ്ങള്‍ക്ക്‌ ആക്രമണം നടത്തുന്നതിനും അവ ഉപയോഗിക്കാമെന്ന്‌ പ്രസിദ്ധീകരണം ചൂണ്ടിക്കാട്ടുന്നു.

പ്രൊഫ. എം.എന്‍.വിജയന്റെ എട്ട്‌ ലേഖനങ്ങളടക്കം 266 പേജാണ്‌ വിജയന്‍ സ്‌മരണികയ്‌ക്കുള്ളത്‌.

ഹര്‍ത്താലുകള്‍ ആഘോഷിക്കാന്‍ മലയാളി തലേന്നേ വാങ്ങുന്നത്‌ ഇരട്ടി മദ്യം

മംഗളം
ഹര്‍ത്താലുകള്‍ എല്ലാ മേഖലയ്‌ക്കും നഷ്‌ടമുണ്ടാക്കുന്നു എന്ന കുറ്റപ്പെടുത്തലില്‍നിന്നു ബിവറേജസ്‌ കോര്‍പറേഷനെ ഒഴിവാക്കാം. ഹര്‍ത്താല്‍, പണിമുടക്ക്‌ തുടങ്ങിയ 'ആഘോഷദിവസ'ങ്ങള്‍ക്കു തലേന്ന്‌ കോര്‍പറേഷന്റെ ലാഭം ഇരട്ടിയിലേറെയാണെന്നു കണക്കുകള്‍ തെളിയിക്കുന്നു. സാധാരണ ദിവസങ്ങളിലേതിനേക്കാള്‍ ഇരട്ടിയോളം തുകയ്‌ക്കുള്ള മദ്യമാണു ബിവറേജസ്‌ കോര്‍പറേഷന്‍ ഹര്‍ത്താല്‍ തലേന്നു വിറ്റഴിക്കുന്നത്‌.

ഹര്‍ത്താലിനു കിട്ടാത്ത 'അവശ്യവസ്‌തു' തലേന്നുതന്നെ കരുതിവയ്‌ക്കുകയാണിപ്പോള്‍ മലയാളിക്കുടിയന്‍മാരുടെ പതിവ്‌. 12 മണിക്കൂര്‍ ഹര്‍ത്താലിന്‌ ആറുമണി കഴിഞ്ഞാല്‍ ബിവറേജസ്‌ ഷോപ്പുകള്‍ തുറക്കുമെങ്കിലും അത്രയ്‌ക്കു ക്ഷമ അവര്‍ക്കില്ല.

ബിവറേജസ്‌ കോര്‍പറേഷനു സംസ്‌ഥാനത്ത്‌ 16 വെയര്‍ഹൗസുകളുടെ കീഴിലായി 330 വിദേശമദ്യ റീട്ടെയ്‌ല്‍ വില്‍പനശാലകളാണുള്ളത്‌.

ഒരു ഔട്ട്‌ലെറ്റില്‍ സാധാരണ ദിവസത്തെ വില്‍പന ശരാശരി 2.21 ലക്ഷം രൂപയുടേതാണ്‌. എല്ലാ വില്‍പനശാലകളിലും കൂടി ദിവസം ശരാശരി 729.30 ലക്ഷം രൂപയുടെ വില്‍പന.

ഇക്കൊല്ലം ഫെബ്രുവരി 19, മേയ്‌ രണ്ട്‌, ജൂണ്‍ അഞ്ച്‌, ജൂലൈ മൂന്ന്‌, ഓഗസ്‌റ്റ് 20 ദിവസങ്ങളിലാണു ഹര്‍ത്താല്‍, പണിമുടക്കുകള്‍ നടന്നത്‌. ഫെബ്രുവരി 18 ന്‌ ബിവറേജസ്‌ കോര്‍പറേഷന്‍ 988.08 ലക്ഷത്തിന്റെയും ഏപ്രില്‍ 30 ന്‌ 1378.90 ലക്ഷത്തിന്റെയും ജൂണ്‍ നാലിന്‌ 1075.14 ലക്ഷത്തിന്റെയും ജൂലൈ രണ്ടിന്‌ 1207.12 ലക്ഷത്തിന്റെയും ഓഗസ്‌റ്റ് 19-ന്‌ 1122.18 ലക്ഷത്തിന്റെയും മദ്യം വിറ്റു.

എല്ലാ കടകമ്പോളങ്ങളും ഹര്‍ത്താല്‍ അനുകൂലികള്‍ ബലമായി അടപ്പിക്കുമ്പോഴും മദ്യവില്‍പനശാലകള്‍ മുടക്കമില്ലാതെ പ്രവര്‍ത്തിക്കാറുണ്ടെന്ന്‌ കൊച്ചിയിലെ 'ദ പ്രോപ്പര്‍ ചാനലി'നു ബിവറേജസ്‌ കോര്‍പറേഷന്‍ വിവരാവകാശ നിയമപ്രകാരം നല്‍കിയ മറുപടിയില്‍ വ്യക്‌തമാക്കുന്നു. ഹര്‍ത്താല്‍ ദിവസങ്ങളില്‍ യഥാക്രമം 476.88 ലക്ഷം, 468.29 ലക്ഷം, 456.88 ലക്ഷം, 408.74 ലക്ഷം, 05.26 ലക്ഷം രൂപയുടെ വില്‍പനയാണു നടന്നത്‌.

അഞ്ചു ഹര്‍ത്താല്‍ ദിവസങ്ങളുടെ തലേന്നുമാത്രം കേരളം കുടിച്ചുതീര്‍ത്തത്‌ 5771.42 ലക്ഷം രൂപയുടെ മദ്യമാണ്‌. സാധാരണ അഞ്ചുദിവസങ്ങളില്‍ മൊത്തം ഏകദേശം 3646.50 ലക്ഷത്തിന്റെ വില്‍പന നടക്കുന്ന സ്‌ഥാനത്താണ്‌ ഇത്‌. ഹര്‍ത്താല്‍തലേന്ന്‌ ഏറ്റവും കൂടുതല്‍ വില്‍പന നടന്നത്‌ എറണാകുളം ജില്ലയിലാണ്‌. 857.27 ലക്ഷം രൂപയുടേത്‌. കുറവ്‌ മലപ്പുറത്തും-213.85 ലക്ഷം.

Friday, October 3, 2008

സെസ്‌: ചിലര്‍ക്ക്‌ വിവാദത്തില്‍ മാത്രം താത്‌പര്യം-പിണറായി

മാതൃഭൂമി, സെപ്തം 24, 2008

കൊല്ലം: പ്രത്യേക സാമ്പത്തികമേഖല അനുവദിക്കുന്നതു സംബന്ധിച്ച്‌ വിവാദമുണ്ടാക്കുന്നവര്‍ക്ക്‌ വിവാദത്തില്‍ മാത്രമാണ്‌ താത്‌പര്യമെന്ന്‌ സി.പി.എം.സംസ്ഥാന സെക്രട്ടറി പിണറായി വിജയന്‍ കുറ്റപ്പെടുത്തി. സി.പി.കരുണാകരന്‍ പിള്ളയുടെ സ്‌മാരകമായി നിര്‍മ്മിക്കുന്ന ചവറ ഏരിയ കമ്മിറ്റി ഓഫീസിന്റെ തറക്കല്ലിട്ട്‌ സംസാരിക്കുകയായിരുന്നു അദ്ദേഹം. രണ്ടാം ഭൂപരിഷ്‌കരണം വേണമെന്ന്‌ ഇന്നേവരെ സി.പി.എമ്മില്‍ ആരും ആവശ്യപ്പെട്ടിട്ടില്ലെന്ന്‌ അദ്ദേഹം വ്യക്തമാക്കി.

സംസ്ഥാനവികസനത്തിന്‌ പ്രത്യേക സാമ്പത്തികമേഖലകള്‍ വേണമെന്നാണ്‌ സി.പി.എമ്മിന്റെ അഭിപ്രായമെന്ന്‌ പിണറായി വിജയന്‍ പറഞ്ഞു. സംസ്ഥാനത്തിന്റെ താത്‌പര്യങ്ങള്‍ സംരക്ഷിച്ചുകൊണ്ട്‌ നടപ്പാക്കണമെന്നാണ്‌ നിലപാട്‌. തൊഴിലാളികളുടെ അവകാശങ്ങളും തൊഴില്‍നിയമങ്ങളും സംരക്ഷിച്ചായിരിക്കും സെസ്‌ നടപ്പാക്കുക. സെസ്‌ വേണ്ടെന്നുപറഞ്ഞാല്‍ ആനുകൂല്യങ്ങള്‍ ആഗ്രഹിക്കുന്ന കമ്പനികള്‍ മറ്റ്‌ സംസ്ഥാനങ്ങളിലേക്ക്‌ പോകും. ഇടതുമുന്നണിയിലും ചര്‍ച്ചകള്‍ നടത്തി വ്യവസ്ഥകള്‍ക്ക്‌ രൂപം നല്‍കുകയാണ്‌ ചെയ്‌തിട്ടുള്ളതെന്ന്‌ പിണറായി പറഞ്ഞു. ഇതു സംബന്ധിച്ച ആശങ്കകള്‍ ദുരീകരിക്കുമെന്നും അദ്ദേഹം വ്യക്തമാക്കി.

രണ്ടാം ഭൂപരിഷ്‌കരണം വേണമെന്ന്‌ അഭിപ്രായമുള്ളവര്‍ സി.പി.എമ്മിലുണ്ടെന്ന്‌ വരുത്തിത്തീര്‍ക്കാന്‍ ശ്രമങ്ങള്‍ നടക്കുന്നു. ഇന്നേവരെ ആരും അത്തരമൊരാവശ്യം ഉന്നയിച്ചിട്ടില്ല. മിച്ചഭൂമി ഏറ്റെടുക്കുന്നതിനൊപ്പം അന്യാധീനപ്പെട്ട സര്‍ക്കാര്‍ഭൂമി തിരിച്ചുപിടിച്ചും വിതരണം ചെയ്യും. ഭൂമി ആദ്യം നല്‍കേണ്ടത്‌ പട്ടികവിഭാഗക്കാര്‍ക്കാണ്‌. ചെങ്ങറസമരത്തിന്റെ മറവില്‍ സി.പി.എമ്മിനും ഇടതുമുന്നണി സര്‍ക്കാരിനും എതിരെ വ്യാപകമായ പ്രചാരണമാണ്‌ നടക്കുന്നത്‌. ഇക്കാര്യത്തിലും പാര്‍ട്ടിയിലോ മുന്നണിയിലോ ഭിന്നതയില്ലെന്ന്‌ പിണറായി വിജയന്‍ ചൂണ്ടിക്കാട്ടി.

സി.പി.എം. സംസ്ഥാനസമിതി അംഗം എം.കെ.ഭാസ്‌കരന്‍ അധ്യക്ഷത വഹിച്ചു. ജില്ലാ സെക്രട്ടറി കെ.രാജഗോപാല്‍, പി.രാജേന്ദ്രന്‍ എം.പി, കെ.വരദരാജന്‍ തുടങ്ങിയവര്‍ സംസാരിച്ചു. ഏരിയ സെക്രട്ടറി ടി.വിക്രമന്‍ സ്വാഗതം പറഞ്ഞു.

സെസ്‌: പ്രത്യേക നിയമത്തിന്‌ സി.പി.ഐ. ഉറച്ചുതന്നെ -വെളിയം

മാതൃഭൂമി, സെപ്തം. 25, 2008

തിരുവനന്തപുരം: സംസ്ഥാനത്ത്‌ പ്രത്യേക സാമ്പത്തിക മേഖല (സെസ്‌) നടപ്പാക്കുന്നതിന്‌ പ്രത്യേക നിയമനിര്‍മ്മാണം വേണമെന്ന്‌ സി.പി.ഐ. വീണ്ടും ശഠിക്കുന്നു. 'സെസ്‌' സംബന്ധിച്ച്‌ പ്രത്യേക നിയമം വേണ്ടെന്നാണ്‌ എല്‍.ഡി.എഫ്‌. യോഗത്തിനുശേഷം എല്‍.ഡി.എഫ്‌. കണ്‍വീനര്‍ വൈക്കം വിശ്വന്‍ പറഞ്ഞതെന്ന്‌ ചൂണ്ടിക്കാട്ടിയപ്പോള്‍, വിശ്വന്‌ ഓര്‍മ്മക്കുറവുണ്ടാകും' നിയമം വേണമെന്ന്‌ ഏകാഭിപ്രായമാണ്‌ എല്‍.ഡി.എഫില്‍ ഉണ്ടായിരുന്നതെന്നായിരുന്നു സി.പി.ഐ. സംസ്ഥാന സെക്രട്ടറി വെളിയം ഭാര്‍ഗ്ഗവന്റെ പ്രതികരണം.

പാര്‍ട്ടി സംസ്ഥാന കൗണ്‍സില്‍ യോഗത്തിനുശേഷം പത്രസമ്മേളനത്തില്‍ സംസാരിക്കുകയായിരുന്നു അദ്ദേഹം. ജോലിസമയം, തൊഴില്‍ നിയമങ്ങള്‍, സംസ്ഥാന നിയമങ്ങള്‍ എന്നിവ പാലിക്കാന്‍ കഴിയുന്ന വ്യവസായങ്ങള്‍ക്കാണ്‌ 'സെസ്‌' അനുവദിക്കേണ്ടതെന്നാണ്‌ സി.പി.ഐ.യുടെ നയം. ഈ കാര്യങ്ങള്‍ക്ക്‌ എല്‍.ഡി.എഫില്‍ ഭിന്നതയുണ്ടായില്ല. സി.പി.എമ്മുമായി തര്‍ക്കമില്ല. അതുകൊണ്ട്‌ മന്ത്രിസഭയില്‍ തര്‍ക്കമുണ്ടാകേണ്ട കാര്യവുമില്ല.

ഇപ്പോള്‍ നിയമമില്ലെങ്കിലും സെസിന്‌ ഇപ്പോള്‍ അപേക്ഷിച്ചവര്‍ക്ക്‌ ഇതിനായി ഭാവിയില്‍ നിര്‍മ്മിക്കുന്ന നിയമങ്ങള്‍ ബാധകമായിരിക്കും. നിയമം എപ്പോള്‍ ഉണ്ടായാലും അതിന്റെ വ്യവസ്ഥകള്‍ ബാധകമാക്കും. മാത്രമല്ല, മറ്റ്‌ ഉത്തരേന്ത്യന്‍ സംസ്ഥാനങ്ങളില്‍ നിന്ന്‌ വ്യവസ്ഥകളില്‍ മാറ്റമുണ്ടാകും. ഉല്‌പാദനക്ഷമമായ വ്യവസായങ്ങള്‍ക്കായിരിക്കണം സെസ്‌ അനുവദിക്കുക. വ്യവസായവുമായി ബന്ധപ്പെട്ട സൗകര്യങ്ങള്‍ക്കാകും 30 ശതമാനം ഭൂമി നല്‍കുക. വന്‍തോതില്‍ ഭൂമി ഏറ്റെടുത്തശേഷം ചെറിയ വ്യവസായവും ബാക്കി മറ്റ്‌ കാര്യങ്ങള്‍ക്കും എന്ന രീതിയോട്‌ അനുകൂലിക്കില്ല. മാത്രമല്ല ഭൂമി കൈമാറ്റം ചെയ്യാനും പാടില്ല. സംസ്ഥാനത്തിന്റെ നികുതിനിയമങ്ങള്‍ക്ക്‌ വിധേയമായായിരിക്കും ഇവയുടെ പ്രവര്‍ത്തനം.

കര്‍ണാടകത്തില്‍ പള്ളികള്‍ക്ക്‌ നേരെ നടന്ന ആക്രമണങ്ങളെ സി.പി.ഐ. സംസ്ഥാന കൗണ്‍സില്‍ അപലപിച്ചു. തിരഞ്ഞെടുപ്പ്‌ അടുത്തപ്പോള്‍ വര്‍ഗ്ഗീയ കക്ഷികള്‍ സജീവമായിരിക്കുകയാണെന്ന്‌ വെളിയം പറഞ്ഞു.

സി.പി.ഐ. അസി.സെക്രട്ടറിമാരായ കെ.ഇ. ഇസ്‌മായിലും സി.എന്‍. ചന്ദ്രനും സന്നിഹിതരായിരുന്നു.

സെസ്‌: സി.പി.ഐ മന്ത്രിമാര്‍ എതിര്‍ത്തു; തീരുമാനം നീട്ടി

മാതൃഭൂമി, സെപ്തം. 25, 2008

തിരുവനന്തപുരം: സി.പി.ഐ മന്ത്രിമാരുടെ പിടിവാശി കാരണം സംസ്ഥാനത്ത്‌ പ്രത്യേക സാമ്പത്തികമേഖലകള്‍ അനുവദിക്കുന്ന കാര്യത്തില്‍ തീരുമാനമെടുക്കാന്‍ കഴിയാതെ മന്ത്രിസഭായോഗം പിരിഞ്ഞു.

സി.പി.ഐയുടെ നിയമസഭാകക്ഷി നേതാവ്‌ കൂടിയായ സി. ദിവാകരനെയാണ്‌ ഈ പ്രശ്‌നം മന്ത്രിസഭയില്‍ അവതരിപ്പിക്കാന്‍ പാര്‍ട്ടി നേതൃത്വം നിയോഗിച്ചത്‌. മന്ത്രി മുല്ലക്കര രത്‌നാകരനും ദിവാകരനോടൊപ്പം നിന്നു. കഴിഞ്ഞ എല്‍.ഡി.എഫ്‌ യോഗത്തില്‍ ഘടകകക്ഷിനേതാക്കള്‍ തമ്മില്‍ ധാരണയിലെത്തിയ ഈ പ്രശ്‌നത്തില്‍ സി.പി.ഐ കാണിച്ച മലക്കംമറിച്ചില്‍ മന്ത്രി തോമസ്‌ ഐസക്കിന്‌ രസിച്ചതുമില്ല. സമയാസമയം വാക്കുമാറി പറയുന്ന പാര്‍ട്ടിക്ക്‌ സ്വന്തമായി എന്തെങ്കിലും ഒരു നയമുണ്ടോയെന്ന്‌ സി.പി.ഐ മന്ത്രിമാരെ അദ്ദേഹം കളിയാക്കുകയും ചെയ്‌തു.

സെസ്സിന്റെ കാര്യത്തില്‍ വ്യക്തത ഇല്ലാതെ ചീഫ്‌ സെക്രട്ടറിയുടെ നേതൃത്വത്തില്‍ തിരഞ്ഞെടുത്ത പത്ത്‌ അപേക്ഷകള്‍ കേന്ദ്രത്തില്‍ അയയ്‌ക്കാന്‍ പാടില്ലെന്ന്‌ പ്രശ്‌നം ചര്‍ച്ചയ്‌ക്കുവന്നപ്പോള്‍ തന്നെ മന്ത്രി ദിവാകരന്‍ അഭിപ്രായപ്പെട്ടു. ഇതിനോട്‌ മന്ത്രിസഭയിലെ സി.പി.ഐ ഇതരനായ ഒരു മന്ത്രിയും യോജിപ്പ്‌ പ്രകടിപ്പിച്ചില്ല. ഇവരുടെ വാദമുഖങ്ങളില്‍ ചില മന്ത്രിമാര്‍ അസ്വസ്ഥരാവുന്നുമുണ്ടായിരുന്നു.

കെ.പി. രാജേന്ദ്രന്‍ മന്ത്രിസഭായോഗത്തിനെത്തിയിരുന്നില്ല. സെസ്‌ സംബന്ധിച്ച്‌ ഒരു നയവും അതനുസരിച്ച്‌ ഒരു നിയമവും കൊണ്ടുവരണം. അല്ലെങ്കില്‍ സ്വാശ്രയനിയമം പോലെയാകുമെന്ന്‌ ദിവാകരനും മുല്ലക്കരയും മുന്നറിയിപ്പ്‌ നല്‌കി.

ഈ വാദത്തെ തോമസ്‌ ഐസക്കും എളമരം കരീമും എതിര്‍ത്തു. എല്‍.ഡി.എഫ്‌ തീരുമാനത്തെ അംഗീകരിക്കാതെ അത്‌ ഇനിയും മാറ്റിവെയ്‌ക്കുന്നത്‌ ശരിയല്ല. അപ്പോള്‍ തങ്ങളുടെ പാര്‍ട്ടിക്ക്‌ ഒരു നയമുണ്ടെന്നായി ദിവാകരന്‍. അപ്പോഴായിരുന്നു തോമസ്‌ ഐസക്കിന്റെ കളിയാക്കല്‍.

സി.പി.എം-സി.പി.ഐ മന്ത്രിമാര്‍ തമ്മില്‍ എല്‍.ഡി.എഫിന്‌ പുറത്തും ആശയവിനിമയം നടത്തിയിരുന്നു. നമ്മുടെ നേതാക്കള്‍ പലവട്ടം ചര്‍ച്ച ചെയ്‌തിട്ടുണ്ട്‌. അതിനാല്‍ ഞങ്ങള്‍ക്ക്‌ ഇതിനോട്‌ വിയോജിപ്പുണ്ടെന്ന്‌ ദിവാകരന്‍ വ്യക്തമാക്കി. നിങ്ങള്‍ക്ക്‌ വേണമെങ്കില്‍ വിയോജിപ്പോടെ തീരുമാനമെടുക്കാം. പക്ഷേ മന്ത്രിസഭായോഗത്തില്‍ വിയോജിപ്പോടെ തീരുമാനമെടുക്കാനാവില്ലെന്ന്‌ തോമസ്‌ ഐസക്ക്‌ പറഞ്ഞു. വിയോജിപ്പ്‌ രേഖപ്പെടുത്തിയാല്‍ മന്ത്രിസഭയ്‌ക്ക്‌ കൂട്ടുത്തരവാദിത്വം ഇല്ലെന്നുവരും. അതിനാല്‍ ഏറ്റുമുട്ടല്‍ വേണ്ട. നമുക്ക്‌ മാറ്റിവെയ്‌ക്കാമെന്നായി ഒടുവില്‍.

29-ാം തീയതി രാവിലെയാണ്‌ എല്‍.ഡി.എഫ്‌ നേതൃയോഗം. വൈകുന്നേരം മന്ത്രിസഭായോഗവും നടക്കും. അതിനുമുമ്പ്‌ ഇതിനായി ഒരു ഓര്‍ഡിനന്‍സ്‌ ഇറക്കുന്നതിനുവേണ്ടിയുള്ള കരട്‌ തയ്യാറാകുമോയെന്ന്‌ നോക്കാമെന്ന്‌ മന്ത്രി എം. വിജയകുമാര്‍ പറഞ്ഞു.

എന്തായാലും ഒരു നിയമം ഉണ്ടായേ മതിയാകൂ എന്ന്‌ സി.പി.ഐ മന്ത്രിമാര്‍ വീണ്ടും പറഞ്ഞു. തൊഴിലാളികളുടെ അവകാശങ്ങള്‍ സംരക്ഷിക്കപ്പെടണം. റിയല്‍ എസ്റ്റേറ്റായി സെസ്സിന്റെ സ്ഥലങ്ങള്‍ മാറാന്‍ പാടില്ല. നികുതിഇളവ്‌, വൈദ്യുതി ഇളവ്‌ എന്നിവയിലെല്ലാം സംസ്ഥാന സര്‍ക്കാരിന്റെ തീരുമാനം ഉണ്ടാകണം. അതിന്‌ ഒരു പൊതുനയം തന്നെവേണം.

മാത്രവുമല്ല ഇപ്പോഴത്തെ 10 അപേക്ഷകള്‍ക്ക്‌, വരാന്‍ പോകുന്ന നിയമം ബാധകമാവുകയും വേണമെന്നും ദിവാകരന്‍ പറഞ്ഞു. ഇങ്ങനെ തര്‍ക്കമുണ്ടെങ്കില്‍ ഒന്നുകൂടി ആലോചിച്ച്‌ തീരുമാനമെടുക്കാമെന്നും അതിനാല്‍ ഇക്കാര്യം മാറ്റിവെയ്‌ക്കുകയാണെന്നും മുഖ്യമന്ത്രി പറഞ്ഞതോടെ പ്രശ്‌നം അവസാനിച്ചു.

എന്നാല്‍ മന്ത്രിസഭായോഗത്തിനുശേഷം നടന്ന പത്രസമ്മേളനത്തില്‍ സെസ്സിന്റെ കാര്യത്തില്‍ തീരുമാനമായെന്നും ഒരു കുഴപ്പവുമില്ലെന്നും ചോദ്യങ്ങള്‍ക്ക്‌ മറുപടിയായി മുഖ്യമന്ത്രി അവകാശപ്പെട്ടു. ആവശ്യത്തിനും അനാവശ്യത്തിനുമുള്ള എഴുത്ത്‌ ഒന്ന്‌ കുറയ്‌ക്കണമെന്നും അദ്ദേഹം പത്രലേഖകരെ ഉപദേശിച്ചു. എല്‍.ഡി.എഫ്‌ നിര്‍ദ്ദേശിച്ച വ്യവസ്ഥകളില്‍ മാറ്റം ഉണ്ടാവില്ലെന്നും അദ്ദേഹം പറഞ്ഞു.

സെസ്സിന്റെ കാര്യത്തില്‍ ഒരു നിയമം വേണമെന്ന്‌ സി.പി.ഐ ആവശ്യപ്പെട്ട കാര്യം ശ്രദ്ധയില്‍പ്പെടുത്തിയപ്പോള്‍ നിയമത്തിന്‍േറയോ ഓര്‍ഡിനന്‍സിന്‍േറയോ ആവശ്യമുണ്ടോയെന്ന മറുചോദ്യമാണ്‌ അച്യുതാനന്ദനില്‍ നിന്നുണ്ടായത്‌. ''സെസ്സിന്റെ കാര്യത്തില്‍ ഏകദേശം ധാരണയായിട്ടുണ്ട്‌. അടുത്ത മന്ത്രിസഭായോഗത്തില്‍ തന്നെ തീരുമാനം നിങ്ങള്‍ക്ക്‌ തരും'' - മുഖ്യമന്ത്രി പറഞ്ഞു. ഇക്കാര്യം ഇനി എല്‍.ഡി.എഫില്‍ ചര്‍ച്ച ചെയ്യേണ്ടിവരുമോയെന്ന്‌ ചോദിച്ചപ്പോള്‍ ഇല്ലെന്നായിരുന്നു മറുപടി.

വെള്ളക്കരം വര്‍ദ്ധിപ്പിച്ചതിനു പുറമെ കറണ്ട്‌ ചാര്‍ജ്‌, ബസ്‌കൂലി, പാല്‍വില എന്നിവയെല്ലാം വര്‍ദ്ധിപ്പിച്ച സര്‍ക്കാര്‍ നടപടിയെക്കുറിച്ച്‌ ചോദിച്ചപ്പോള്‍ സര്‍ക്കാര്‍ നല്‌കുന്ന കോടിക്കണക്കിന്‌ രൂപയുടെ ഇളവുകളെക്കുറിച്ച്‌ നിങ്ങള്‍ ഒന്നും പറയാത്തതെന്താണെന്ന്‌ അച്യുതാനന്ദന്‍ ചോദിച്ചു. ''ആനുകൂല്യങ്ങള്‍ നല്‌കുന്നതൊന്നും നിങ്ങള്‍ പ്രസിദ്ധീകരിക്കരുത്‌. ഈ ജാതി എഴുത്ത്‌ ഒന്ന്‌ കുറയ്‌ക്കൂ.''

വൈദ്യുതിബോര്‍ഡിന്റെ കാര്യത്തില്‍ 25ന്‌ സര്‍വകക്ഷിയോഗം ചേരുന്നുണ്ട്‌. ഉച്ചയ്‌ക്കുശേഷം തൊഴിലാളി യൂണിയനുകളുടേയും. വൈദ്യുതിബോര്‍ഡ്‌ സ്വകാര്യവത്‌കരിക്കാനുള്ള നീക്കമാണ്‌ കേന്ദ്രസര്‍ക്കാര്‍ നടത്തിക്കൊണ്ടിരിക്കുന്നത്‌. സാധാരണക്കാര്‍ക്ക്‌ അതനുസരിച്ച്‌ ഭാരം കൂടും. അതിനെതിരെ ശക്തമായ നിലപാടാണ്‌ സര്‍ക്കാര്‍ എടുത്തിരിക്കുന്നത്‌. രാഷ്ട്രീയ പാര്‍ട്ടികളൊന്നും ജനങ്ങള്‍ക്ക്‌ എതിരായ നിലപാട്‌ സ്വീകരിക്കുകയില്ലെന്നും മുഖ്യമന്ത്രി പറഞ്ഞു.

കെ.എസ്‌.ഇ.ബി.യെ മൂന്നുമാസം കൂടി നിലനിര്‍ത്താനായി മുഖ്യമന്ത്രി കേന്ദ്ര ഊര്‍ജമന്ത്രിയുമായി ചര്‍ച്ച ചെയ്യണമെന്ന അഭിപ്രായവും മന്ത്രിസഭായോഗത്തിലുണ്ടായി.

വിഴിഞ്ഞം തുറമുഖത്തിനുവേണ്ടിയുള്ള സ്ഥലമെടുപ്പിനെതിരെ ചിലര്‍ നടത്തുന്ന സമരം ചൂണ്ടിക്കാണിച്ചപ്പോള്‍ ഞങ്ങളത്‌ ഭംഗിയായി കൈകാര്യം ചെയ്യുമെന്നായിരുന്നു മറുപടി. ഐ.എസ്‌.ആര്‍.ഒ.യ്‌ക്ക്‌ 40 ഏക്കര്‍ വലിയമലയില്‍ തന്നെ കൊടുത്തു. അതുപോലെ ഇപ്പോഴവിടെ എടുക്കാന്‍ പോകുന്ന സ്ഥലങ്ങളിലെ വീട്ടുകാര്‍ക്ക്‌ ആവശ്യമായ സ്ഥലം അവിടെത്തന്നെ സൗകര്യപ്പെടുത്തിക്കൊടുത്തിട്ടേ എടുക്കൂ. അവരെ ദൂരേയ്‌ക്ക്‌ കൊണ്ടുപോകില്ല. സൗകര്യങ്ങള്‍ ഒരുക്കിയശേഷമേ പദ്ധതി മുന്നോട്ടുകൊണ്ടുപോവുകയുള്ളൂ.

വല്ലാര്‍പാടത്തും ഇതായിരുന്നല്ലോ സ്ഥിതി. അവിടെ ചില വീട്ടുകാരെ കൈയിലെടുത്തുകൊണ്ടുള്ള കളികള്‍ നാം കണ്ടു. എന്നാല്‍ വളരെ സമാധാനപരമായി അവിടെ കാര്യങ്ങള്‍ നടന്നു. ഇവിടത്തെ പ്രക്ഷോഭവും രമ്യമായി പരിഹരിക്കും. റിയല്‍ എസ്റ്റേറ്റുകാരും മറ്റും നാട്ടുകാരെ ഇളക്കിവിട്ട്‌ പേടിപ്പിച്ച്‌ മുതലെടുക്കാനുള്ള ശ്രമത്തിലാണ്‌. അതില്ലാതാക്കുമെന്നും മുഖ്യമന്ത്രി വ്യക്തമാക്കി.

സെസ്‌: സി.പി.ഐയിലെ രോഷം അടക്കിയത്‌ വെളിയത്തിന്റെ ഭീഷണി

മാതൃഭൂമി, സെപ്തം. 26, 2008

തിരുവനന്തപുരം: സെസ്‌ സംബന്ധിച്ച വിവാദം നേതൃത്വത്തിനെതിരെയുള്ള കുറ്റവിചാരണയായി മാറിയത്‌ സി.പി.ഐ യില്‍ ആഴത്തിലുള്ള മുറിവിനു കാരണമായി. എല്‍.ഡി.എഫ്‌. യോഗത്തില്‍ പാര്‍ട്ടിയെ പ്രതിനിധീകരിച്ച രണ്ട്‌ അസിസ്റ്റന്റ്‌ സെക്രട്ടറിമാര്‍ക്കെതിരെയായിരുന്നു നിശിത വിമര്‍ശം. പാര്‍ട്ടിയുടെ അഭിപ്രായം ഇടതുമുന്നണി യോഗത്തില്‍ ഫലപ്രദമായി അവതരിപ്പിക്കാന്‍ കഴിഞ്ഞില്ലെന്ന്‌ പറഞ്ഞ്‌ തുടങ്ങിയ കുറ്റപ്പെടുത്തല്‍ അവരെ സംശയിക്കുന്ന ഘട്ടത്തിലേക്ക്‌ കടന്നപ്പോള്‍ എക്‌സിക്യൂട്ടിവ്‌ യോഗത്തില്‍ ഒരുവേള സംസ്ഥാന സെക്രട്ടറി വെളിയം ഭാര്‍ഗവന്‍ പൊട്ടിത്തെറിച്ചു -''ആര്‍ക്കും ആരെയും വിശ്വാസമില്ലെങ്കില്‍ നിങ്ങള്‍ പരസ്‌പരം തമ്മിലടിച്ചോ. ഞങ്ങള്‍ ഒഴിഞ്ഞേക്കാം''. വെളിയത്തിന്റെ ഈ രാജിഭീഷണിയാണ്‌ ഒരു പരിധിവരെ അസിസ്റ്റന്റ്‌ സെക്രട്ടറിമാരായ കെ.ഇ.ഇസ്‌മയിലിനെയും സി.എന്‍.ചന്ദ്രനെയും തുണച്ചത്‌. കൗണ്‍സിലിലും ഇതിന്റെ അനുരണനങ്ങളുണ്ടായി.

സെസ്‌ അനുവദിക്കുന്നതിനു മുമ്പ്‌ നിയമം വേണമെന്നായിരുന്നു സി.പി.ഐ. എക്‌സിക്യൂട്ടീവിന്റെ തീരുമാനം. കാനം രാജേന്ദ്രന്‍, തിരുവനന്തപുരം ജില്ലാ സെക്രട്ടറി പി.രാമചന്ദ്രന്‍ നായര്‍, കൊല്ലം ജില്ലാ സെക്രട്ടറി കെ.പ്രകാശ്‌ ബാബു എന്നിവരടങ്ങുന്ന ഉപസമിതിയുടെ റിപ്പോര്‍ട്ടിന്റെ അടിസ്ഥാനത്തിലായിരുന്നു പാര്‍ട്ടി ഈ നിലപാടെടുത്തത്‌. എന്നാല്‍ ഇടതുമുന്നണി യോഗത്തില്‍ പാര്‍ട്ടി പ്രതിനിധികള്‍ ഈ നിലപാട്‌ ശക്തമായി ഉന്നയിച്ചില്ലെന്നായിരുന്നു എക്‌സിക്യൂട്ടിവിലും കൗണ്‍സിലിലും ഉയര്‍ന്ന വിമര്‍ശം.

പാര്‍ട്ടിയെക്കുറിച്ച്‌ ഏറെ സംശയത്തിന്‌ ഇടവരുത്തുന്ന നിലപാടാണ്‌ സെസ്‌ കാര്യത്തില്‍ സ്വീകരിച്ചതെന്ന്‌ പ്രകാശ്‌ബാബു എക്‌സിക്യൂട്ടീവില്‍ തുറന്നടിച്ചു. സപ്‌തംബര്‍ 30നകം അപേക്ഷകളെല്ലാം നല്‍കണമെന്ന നിബന്ധന കേന്ദ്രനിയമത്തിലൊന്നുമില്ലെന്ന്‌ രാമചന്ദ്രന്‍ നായര്‍ പറഞ്ഞു. 'പുലിവരുന്നേ പുലി'യെന്നു പറഞ്ഞ്‌ ചിലര്‍ പേടിപ്പിക്കുകയാണ്‌. ഇക്കാര്യത്തില്‍ നയവ്യതിയാനത്തെക്കാളുപരി പാര്‍ട്ടി നിലപാട്‌ മറന്ന്‌ മറ്റൊരു നിലപാട്‌ കൈക്കൊണ്ടത്‌ സംശയത്തിനിട നല്‍കിയെന്ന്‌ അദ്ദേഹവും പറഞ്ഞു. തുടര്‍ന്നു പ്രസംഗിച്ച ഓരോരുത്തരും അസിസ്റ്റന്റ്‌ സെക്രട്ടറിമാരെ വിമര്‍ശനത്തിന്റെ മുള്‍മുനയില്‍ നിര്‍ത്തി.

ഇടയ്‌ക്കുചേര്‍ന്ന എക്‌സിക്യൂട്ടിവിനുശേഷം കൗണ്‍സില്‍ ചേര്‍ന്നപ്പോള്‍ വിമര്‍ശം കൂടിവന്നതേയുള്ളൂ. അസിസ്റ്റന്റ്‌ സെക്രട്ടറിമാരുടെ മാത്രമല്ല, ഘടകങ്ങളുടെ ചുമതലയുള്ളവരുടെ നിലപാടുകള്‍ക്കെതിരെയും ശബ്ദമുയര്‍ന്നത്‌ വെളിയമടക്കമുള്ളവരെ ഉദ്ദേശിച്ചായിരുന്നു. ഈ ഘട്ടത്തില്‍ വെളിയം ഭാര്‍ഗവന്‍ പറഞ്ഞു -''അസിസ്റ്റന്റ്‌ സെക്രട്ടറിമാര്‍ മാത്രം ഒഴിയേണ്ട. സെക്രട്ടറിയും ഒഴിഞ്ഞേക്കാം''.

മൂന്നാര്‍ സംഭവത്തില്‍ പാര്‍ട്ടിക്കു നാണക്കേട്‌ വരുത്തിയവര്‍ തന്നെയാണ്‌ സെസ്‌ കാര്യത്തിലും പ്രശ്‌നമുണ്ടാക്കിയതെന്ന്‌ എ.ഐ.വൈ.എഫ്‌. മുന്‍ സെക്രട്ടറി വേലപ്പന്‍ പറഞ്ഞു. സി.പി.എമ്മുമായി താഴെത്തട്ടില്‍ തങ്ങള്‍ പോരാടി നിലനില്‍ക്കുമ്പോള്‍ ഇത്തരം തീരുമാനങ്ങള്‍ക്ക്‌ നേതൃത്വം വഴങ്ങുന്നത്‌ ശരിയല്ലെന്നായിരുന്നു പത്തനംതിട്ട ജില്ലാപ്പഞ്ചായത്ത്‌ വൈസ്‌ പ്രസിഡന്റ്‌ ജയന്റെ വിമര്‍ശം. ജനഹിതം മനസ്സിലാക്കണമെന്ന്‌ എപ്പോഴും ഉപദേശിക്കുന്ന നേതൃത്വം ജനഹിതം ഉള്‍ക്കൊള്ളാതെ തീരുമാനമെടുക്കുന്നുവെന്ന്‌ തൃശ്ശൂരില്‍ നിന്നുള്ള പ്രതിനിധി കുറ്റപ്പെടുത്തി.

നിയമം വേണമെന്ന ശക്തമായ അഭിപ്രായം മന്ത്രിസഭായോഗത്തില്‍ എടുക്കാന്‍ മന്ത്രിമാരോട്‌ നിര്‍ദ്ദേശിച്ച്‌ വെളിയം യോഗം അവസാനിപ്പിക്കുമ്പോള്‍ അസിസ്റ്റന്റ്‌ സെക്രട്ടറിമാരെ കൈവിട്ടില്ല. അവര്‍ പാര്‍ട്ടി നിലപാട്‌ മുന്നണി യോഗത്തില്‍ വ്യക്തമാക്കിയതാണെന്നും ഇക്കാര്യത്തില്‍ വീഴ്‌ച ഉണ്ടായതായി കരുതുന്നില്ലെന്നും വെളിയം വ്യക്തമാക്കി.
 

blogger templates | Make Money Online