മാതൃഭൂമി, ജൂലൈ 26
തിരുവനന്തപുരം: മുന്‍ മുഖ്യമന്ത്രി ഇ.കെ.നായനാരുടെ സ്‌മരണയ്‌ക്കായി സി.പി.എം. നേതൃത്വം മുന്‍കൈയെടുത്ത്‌ കണ്ണൂരില്‍ സംഘടിപ്പിച്ച ഫുട്‌ബോള്‍ മേളയ്‌ക്ക്‌ കളങ്കിതരില്‍ നിന്ന്‌ പണം വാങ്ങിയെന്ന ആരോപണത്തെക്കുറിച്ച്‌ അന്വേഷിക്കുമെന്ന്‌ മുഖ്യമന്ത്രി വി.എസ്‌.അച്യുതാനന്ദന്‍ പറഞ്ഞു.
ഈ പ്രശ്‌നം തന്റെ ശ്രദ്ധയില്‍ പെട്ടിട്ടില്ലെന്ന്‌ മന്ത്രിസഭാ യോഗത്തിനുശേഷം നടന്ന പത്രസമ്മേളനത്തില്‍ ചോദ്യത്തിനു മറുപടിയായി അദ്ദേഹം പറഞ്ഞു. കളങ്കിതരായവരില്‍ നിന്ന്‌ പണം വാങ്ങിയതായി കാണുന്നുമില്ല. എന്നാല്‍ ആരോപണം ഉണ്ടായ സ്ഥിതിക്ക്‌ അന്വേഷിക്കും.
എന്നാല്‍ ഫുട്‌ബോള്‍ സംഘാടകസമിതി ജനറല്‍ കണ്‍വീനര്‍ എം.വി.ഗോവിന്ദന്‍ പുറപ്പെടുവിച്ച പ്രസ്‌താവനയില്‍ ഇതുസംബന്ധിച്ച പത്രവാര്‍ത്ത നിഷേധിച്ചില്ലെന്ന്‌ ചൂണ്ടിക്കാണിച്ചപ്പോഴാണ്‌ അന്വേഷണം നടത്താമെന്ന്‌ മുഖ്യമന്ത്രി പറഞ്ഞത്‌.
